Paasi ‘a e Patiseti lahitaha kuo a’usia ‘e he fonua
3 Siulai, 2023. Na’e paasi ‘i he uike kuo maliu atu ‘e hje Fale Alea ‘o Tonga ‘a e patiseti lahi taha kuo a’usia ‘e he fonua ‘a ia na’e fe’unga mo e pa’anga ‘e $784.2 pe koe pa’anga ‘Amelika ‘e $331 miliona.
Ko e patiseti foki ‘eni ki he ta’u faka-pa’anga 2023-24 pea na’e paasi ‘eni ‘i he po’uli hifo ‘o e ‘aho Tusite 27 ‘o Sune 2023 ‘aki ‘a e loto kiai ‘a e toko 14 pea ‘ikai ha fakahaloto kiai.
Na’e kau foki ‘eni he patiseti loloa taha ‘a e feme’a’aki kiai pea na’e fefeka ‘a e ngaahi tipeiti pea iku ke toe mahino ange ia honi fakama’ala’ala ‘o e patiseti ni mei he tafa’aki ‘a e Pule’anga.
‘Oku mahino foki koe patiseti fe’amokaki ‘eni ‘a ia ‘oku ‘uhinga ia ‘oku lahi ange ‘a e fakamole ‘oku fokotu’u mai ke fakalele ‘aki ‘a e fonua ‘i he pa’anga ‘oku lava ke tanaki ke fakalele ‘aki ‘a ia ‘oku hulu’aki ‘a e pa’anga ‘e $38.1 miliona.
Fakatatau ki he fakamatala ‘a e ‘Eiki Minisitā Pa’anga Hon. Tiofilusi Tiueti koe lahi taha ‘o e patiseti ko’eni ‘oku ‘ave ia ki he Potungāue ki he Ngaahi Ngāue Lalahi ‘a ia koe peseti ia ‘e 18% pea peseti leva ‘e 17 ki he Potungāue Ako mo e Ako Ngāue.
‘Oku laha hake foki he peseti ‘e 46.6% ‘o e patiseti ko’eni ‘oku fakapa’anga ia mei he tokoni ‘a e ngaahi fonua muli pehē ki he ngaahi kautaha faka vaha’a Pule’anga ‘a ia ‘oku fakafuofua ia ki he pa’anga ‘e $364.7 miliona pea koe toenga leva ‘oku fua ia ‘e he tukuhau ‘a e fonua.
Kuo kamata ngaue’aki ‘a e patiseti ko’eni ‘i he kamata’anga pe ‘o e mahina ko Siulai.
