'Ikai tali 'e he Fakamaau'anga Tangi tangi 'a Tei, Moeaki mo Saulala Featured
9 'Aokosi, 2022. Kuo 'ikai tali 'e he Fakamaau'anga Tangi 'a e tangi 'a e toko tolu 'o e Hou'eiki Memipa 'o e Kapineti makatu'unga 'i hono tautea kinautolu 'i he Fakamaau'anga Lahi ke mole honau sea mei he Fale Alea 'o Tonga.
Ko e tangi 'eni na'e fakahoko ki he Fakamaau'anga Tangi 'e he Tokoni Palemia Poasi Mataele Tei, Minisita Pa'anga mo e Palani Fakafonua Tatafu Moeaki pea mo e Minisita ki he Ngaahi Ngaue Fakalotofonua Sione Sangster Saulal
Ko e tu'utu'uni aofangatuku 'eni 'a e Fakamaau'anga Tangi 'a ia na'e fakahoko 'i he efiafi 'o e 'aho ni 'a ia 'oku mahino mei ai 'e fakahifo leva 'a e toko 3 ko'eni mei he'enau hoko koe kau memipa 'o e Fale Alea 'o Tonga pehe foki ki he Kapineti 'a 'Ene 'Afio.
Na'e tali 'e he Fakamaau'anga Tangi ia 'a e tangi 'a e Fakafofonga Fale Alea Tongatapu 10 Dr. Pohiva Tui'onetoa hili ia hano tu'utu'uni 'i he Fakamaau'anga Lahi kene halaia pea ke fakahifo ia mei hono lakanga.
Na'e kole foki 'e he kau Faka'iloa 'i he mahina ko Sune ke tuku fakatatali 'a e ngaahi tu'utu'uni 'i he Fakamaau'anga Lahi kae fakahoko 'enau ngaahi tangi pea na'e tali kotoa 'eni 'e he Fakamaau'anga 'o iku ke toki fakahoko 'a e ngaahi hopo tangi ko'eni 'i he uike faka'osi 'o Siulai 2022.
Ko e ngaahi faka'ilo 'eni na'e fakahoko hili 'a e Fili Fale Alea 'o e ta'u 2021 pea na'e faka'ilo 'a e ni'ihi ko'eni 'o tukuaki'i ki he totongi fakafufuu ke fakatau 'a e fili 'a e kakai 'o fakatatau mo e Kupu 25 'o e Lao Fili Fale Alea.
Na'e faka'ilo foki pea mo e Fakafofonga 'o Tongatapu 1 Tevita Fatafehi Puloka 'e hono kaunga Kanititeiti ko Siaosi Pohiva pehe ki he Fakafofonga Tongatapu 2 Dr. 'Uhilamoelangi Fasi 'e he hono kaunga Kanititeiti ko Semisi Sika ka na'e fakatonuhia'i kinaua ia 'i he Fakamaau'anga Lahi.
Na'e iku ki he tangi 'a e ongo Talatalaaki ki he Fakamaau'anga Tangi 'o iku fakatonuhia'i pe 'e he Fakamaau'anga Tangi ia 'a e Tu'utu'uni 'a e Fakamaau'anga Lahi.
'Oku te'eki ke mahino mai pe 'e fakahoko 'a fe ha fili si'i ke fetongi 'a e kau fakfofonga ni ka 'e mahinio kotoa hili hano fakahifo faka'ofisiale kiautolu mei he'enau hoko koe kau Fakafofonga 'i he Fale Alea 'o Tonga.
