Ha'ele Faka-Tu'i 'a e Tu'i Ha'apai Tupou VI ki he Ngaahi Feitu'u Pule'i Makehe 'o e 'Otu Ha'apai ^Featured

Na'e kau he Katoanga Ha'apai Masani 2018 'a e Uike Heliala mo e Faka'ali'ali Ngoue Faka-Tu'i mo e Konifelenisi Fakata'u hono 95 'a e Siasi Uesiliana Tau'ataina 'o Tonga.

Na'e kamata hono fokotu'u 'a e Polokalama 'o e Ngaahi Feitu'u Pule'i Makehe he 'Otu Tonga he 2006 hono fa'u 'a e Lao ki he Toutai 2002 'o fakahoko 'e he Potungaue Toutai. 'Oku tefito 'a e polokalama ni hono faka'ilonga'i makehe 'a e ngaahi konga tahi mo e ngaahi fanga 'o e ngaahi kolo ke nau takitaha pule'i mo tauhi mo tokanga'i hono koloa ko e ma'u'anga mo'ui tefito 'a e kakai mo langa 'a e ngaahi fatongia tupu'a he fonua he'enau fengaue'aki mo fetauhi'aki vaofi honau va.

'Oku mafola mamalie 'a e fakakaukau ni neongo na'e fai lahi 'eni he kuohili ko e founga hono pule'i mo fakatolonga 'o tahi. 'Oku a'u 'eni ki he kolo 'e 27 kuo kau he polokalama talu mei he 2006 'a ia ko e 9 'a Tongatapu / Tonga'eiki / Tongalahi, 11 'a Vava'ulahi mo 8 'a e 'Otu Ha'apai. Na'e fua kau 'a 'O'ua, Ha'afeva, Kotu, Matuku, Nomuka, Mango, Fonoi mo Felemea, pea mo e ngaahi kolo fo'ou 'e 8 kehe ko Faleloa, Fakakakai, Pukotala, Ha'ano, Muitoa, Mo'unga'one, Lofanga mo 'Uiha.

Na'e kamata 'a e ha'ele takavaha mo e taka'uta 'enau 'Afifio 'i Faleloa mo hoko atu ki he Kauvai ki Ha'ano, Fakakakai, Pukotala, Muitoa mo Mo'unga'one mo Lofanga mo 'Uiha pea mulituku ki Felemea 'a ia na'e fai ai hono talitali 'e he kainga 'o Soakai mo Nopele Fielakepa. Na'e fai ai 'a e taumafa ho'ata fakataha mo e fakaPangai hono fakatu'uta 'a e ngaue mo e ma'alali mo fakame'ite 'a e kainga mo to e ha'ele 'o 'afio ki he Langi 'o Tu'itatui he Fonua-Malu-'oe-Hau he Likutapu.

Na'e muimui folau he ha'ele takavaha mo e taka'uta 'enau 'Afiofio 'a e kau Nopele mo e Hou'eiki mo e Hou'eiki Matapule Ma'utofi'a, kau 'Amapasitoa 'o e ngaahi 'Emipesi Muli, kau Tu'ukimu'a 'o e Pule'anga mo e Siasi, kau Minisita mo e kau Fakafofonga Falealea, kau 'Ofisa Ma'olunga 'o e Kau Tau 'A 'Ene 'Afio mo e kau Polisi, kau Tauhifonua mo e kau Matapule, pea mo e kakai tokolahi ne nau fakatefua he Fele-'ae-Me'a ko e tali 'a e Hau 'o Tonga mo e Fonua.

Na'e ongo malie mo mafana mo to e fakalangi mo fakahevani makehe hono tufungalea 'o e taha 'o e ngaahi matapa he Fele-'ae-Me'a 'a ia na'e fakalea 'o pehe, "Talitali Loto Mafana 'a Ho'omo 'Afifio ki 'Api ko e Fanautama mo e Mokopuna 'o Soakai ki he 'Esi 'o Ma'afu, 'Otukinekina, Vai ko Ha'ahao, Fonuamalu-kihe-Hau, mo e Taulanga Pualoto. Ke Lakoifie Fuoloa ai pe 'a e Pule 'a Ha'a Moheofo." 'Ofa ke ke i mo'oni 'a e lea ka e ke i mo'oni 'a e Tu'i Ha'apai ko e Tu'i Tupou ko e Tu'i 'a e Tautahi.

'Oku 'ikai fai ha ofo ai he 'oku telio 'ai 'a e hou'eiki lalahi 'o Tonga pea mo Tu'itatui ko e Tu'i Tonga 11 (Tu'i Tonga Lafa) ko e 'alo 'o Momo ko e Tu'i Tonga 10 mo Nua ko e 'ofefine hoihoifua 'o Lo'au ko e tokaiMa'ananga he Lepa-i-Fualu, mo e tufunga fonua 'iloa. Na'a ne tufunga 'a e Vahefonua 'a Lo'au mo to e tufunga 'a e Tala 'o e Kava mo e To mo e Tala 'o e Ouau 'o e Kava mo e To 'o humaki he Talamalu 'a Lo'au ko e tomu'a inu 'a e kona ka e toki kai 'a e melie he me'a lelei mo tolonga kotoa.