Ikuna 'e he Ifi Palasa 'a e Kolisi Ko Tupou fe'auhi ifi palasa 'i Nu'usila
15 Siulai 2024. 'Oku fakahisitolia 'a hono ikuna 'e he Ifi Palasa 'a e Kolisi Ko Tupou 'a e fe'auhi ifi palasa 'i Nu'usila 'a ia 'oku 'iloa ko e 2024 New Zealand National Brass Band Championships.
Ko e fe'auhi foki 'eni na'e 'aho 'e 4 pea na'e fakahoko ia 'i Due Drop Events Centre 'i Manukau 'i he Saute 'o 'Aokalani pea na'e kakato ki he faka'osinga 'o e uike kuo 'osi.
Ko e katoanga fakata'u 'eni pea 'oku faka'ali'ali ai 'a e ngaahi kau ifi 'iloa taha 'o Nu'usila kau mai kiai mo e ngaahi kau ifi palasa mei he ngaahi fonua 'i tu'apule'anga.
Na'e ikuna foki 'e he ifi 'a e Kolisi Ko Tupou 'a e ngaahi pale lalahi mo mahu'inga pea kau kiai 'enau ikuna 'a e sila ki he kau ifi na'e kau atu ki he Kulupu B Grade pea koe ifi 'a e Kolisi Ko Tupou 'a e kau ifi ta'u iiki taha na'e kau atu ki he kulupu ko'eni.
Ko e toki fuofua taimi 'eni ke fakahoko ai 'a e fe'auhi ni ki he Saute 'o 'Aokalani 'a ia koe feitu'u foki 'eni 'oku tokolahi taha ai 'a e matakali Polinisia 'i Nu'usila.
Na'e kau mai foki 'a e ngaahi kau ifi mei Australia, Hong Kong, Japan, pea mo Tonga ni mo e ngaahi kau ifi 'i Nu'usila foki.
Ko e kau ifi 'a e Kolisi Ko Tupou na'e makehe pea na'e manakoa pea mahino 'a 'enau taleniti'ia pea na'e mahino pe foki ia 'i he lahi 'a e ngaahi pale moe ngaahi fakalangilangi makehe na'a nau ikuna.
Na'e 'i ai foki 'a e ngaahi fasi tu'utu'uni kau kiai 'a e Sacred Item, Test Piece mo e Own Choice Selection pea na'e matu'aki vaofi mo fihi tu'u 'a e fe'auhi 'o iku ke ikuna ai 'e he Kolisi Ko Tupou 'aki 'a e poini 'e 1 fakalaka 'i he kau ifi 'a e Eastern Bay of Plenty pea tolu mai leva 'a e kau ifi 'a e Hutt City Brass.
Na'e 'ikai toe veiveiua hono ikuna ia 'e he Kolisi Ko Tupou 'a e fe'auhi laka (Street March) pea na'e foaki ai 'a e ngahai pale ko'eni kia Pilinisi Taufa'ahau Manumataongo ka koe ako lolotonga pea na'e kau atu moia ki he folau ko'eni.
