Toloi hono fakafoki mai hotau kainga mei muli ki he ta'u kaha'u Featured
17 Novema, 2021. Kuo fakamahinio mei he pule lahi 'o e MEIDECC Paula Ma'u 'e toloi katoa 'a e ngaahi fepuna'aki na'e fakataumu'a ke fakafoki mai hotau kainga Tonga mei muli ki he ta'u 2022.
'Oku mahino mai foki koe toko 3.122 pe hotau kainga Tonga kuo fakafoki mai mei muli talu mei hono kamata 'a e fakataputapui 'i he ta'u 2020.
'Oku makatu'unga foki 'eni mei hono sivi 'oku positivi 'a e matapule Tonga na'e kau he toko 215 na'a nau folau mai mei Christchurch 'i he ngaahi uike kuo maliu atu.
Kuo toe fakamahino foki mei he Potungaue Mo'ui kuo tukuange 'a kinautolu 'a e kau ngaue lainimu'a na'e kolonitini hili 'a e tu'uta 'a e vakapuna mei Christchurch he 'aho 27 'o 'Okatopa.
Kuo 'osi faka'ata foki 'a e fakataputapui ia 'a e fonua hili e mahino mai 'oku hao pe 'a e matapule na'e sivi kuo positivi pea 'oku 'ikai fakatu'utamaki ki he fonua.
'Oku kei toko lahi pe hotau kainga 'oku nau kei fihia atu he ngaahi fonua muli talu mei he kamata 'a e fakataputapui fakavaha'a Pule'anga 'a e fonua 'i Ma'asi 2020.
