Lava e tatau 'a e fonua mo e lotu kia Palōnesi Tuputupu ‘o Pulotu Vaea Featured
2 'Aokosi, 2021. Na’e fakahoko he houa pongipongi ‘o e ‘aho ni ‘a hono fai ‘o e me’afaka’eiki ‘a e fehuhu ‘a e Kuini ‘o e ‘Otu Tonga, Baroness Tuputupu ‘o Pulotu Vaea ‘o Houma pea na’e fakahoko pe ‘a e ouau ko’eni ‘i Houma pe.
Na’e fakakakato ‘a e ouau ‘o e me’afaka’eiki ‘i he Falelotu SUTT ‘o Houma pea hoko atu ai pe ki he fa’itoka Kolomanatau ‘o fakahekeheka ai pe ‘a e folau ‘a e fa’ē fita ko’eni ‘oku ‘iloa he fonua mo e lotu.
Na’e ‘Afio ‘a e Tama Tu’i ‘i he ouau ‘o e ‘aho ni pehe ki he Ta’ahine Pilinisesi Pule Sālote Mafile’o Pilolevu Tuita mo e Hou’eiki ‘o e fonua, Palēmia mo e Hou’eiki Minisitā ‘o e Kapineti, Sea ‘o e Fale Alea mo e Hou’eiki Mēmipa ‘o e Fale Alea, ni’ihi ‘o e kau fakafofonga faka-Tipilometika pehe ki he ngaahi maheni mo e kakai tokolahi.
Na’e fakahoko hono malanga’i ‘o e me’afaka’eiki ‘e he Tangata’eiki Palesiteni ‘o e Siasi Uesiliana Tau’atāina ‘o Tonga Faifeka Dr. Tevita Koloa’ia Havea pea na’e tokoni kiai ‘a e ongo Tangata’eiki Palesiteni Malōlō Faifekau Dr. ‘Ahio mo Faiofekau Dr. ‘Alifaleti Mone, Sekelitali Lahi e Siasi SUTT Faifekau ‘Alifaleti ‘Atiola mo e kau faifekau tokolahi.
Na’e me’a ai ‘a e ‘Eiki Katinali Soane Patita Paini Mafi pehe ki he Palesiteni ‘o e Siasi ‘o Tonga Tau’atāina mo e ni’ihi ‘o e kau takilotu ‘o e fonua.
Na’e pekia foki ‘a Baroness Tuputupu ‘o Pulotu Vaea ‘i hono ‘api me’a’anga pe ko Talikiha‘apai ‘i Houma pe ‘i he ‘aho 29 ‘o Siulai 2021 ‘i hono ta’u 90.
Na’e fā’ele’i foki ‘a Tuputupu ‘o Pulotu Vaea ‘i he ta’u 1930 pea na’e ma’u hoa kia Lord Vaea ‘o Houma ‘i he ta’u 1952 pea koe lahi taha ‘i he’ena fanau ko Kuini Nanasipau’u Tuku’aho.
Ko e fika 3 ko ‘Alipate Tu’ivanuavou Vaea ‘a ia ‘oku hoko ko e Lord Vea ‘o e ‘aho ni.
Ko Tuputupu ‘o Pulotu Vaea ko e ‘ofefine ia ‘o Sosaia Lausi‘i Ma’afu ‘o Vaini (Lord Ma’afu Tukui’aulahi) mo Tokomololo mo ‘Anau-ki he-Sina Mafile’o ‘o Kolomotu’a, Neiafu, mo Vaimalō ‘i Vava’u.
