Laka he toko 846 kuo fakafoki mai ki Tonga ni lolotonga e fakataputapui Featured
Hotele Tanoa 'oku nofo ai e konga 'o kinautolu 'oku kolonitini
20 Novema, 2020. Kuo tu’uta ha toko 175 ‘i Tonga ni ko hotau kainga ‘oku nau kau ki hono fakafoki mai ‘i he polokalama ‘a e Pule’anga pea ko 'enau folau mai ‘eni mei Nu’usila he efiafi ‘aneafi.
Ko e toko 64 ‘o e kau pasese ko’eni ‘e kolonitini kinautolu ‘i he ‘aho ‘e 14 ka hoko ‘i he Kemi Makeke ‘i Vaini, pea koe toenga leva ‘e kolonitini kinautolu ‘i he Hotele Tanoa (Tanoa International Dateline Hotel) ‘i Nuku'alofa.
Kuo a’u ‘eni ki he toko 846 ‘a hotau kainga kuo fakafoki mai ‘i he polokalama ko’eni ‘a e Pule’anga ‘i he’ene fekau’aki mo e panatemika faka mamani lahi koia koe covid-19.
‘Oku ‘amanaki ke toe tu’uta mai mo e toko 175 mei Pilispeini ‘Aositelēlia ‘i he ‘aho Tūsite uike kaha’u.
Lolotonga ‘eni kuo ma’u ‘a e fuofua keisi Covid-19 ‘a Ha’amoa mo Vanuatu ‘uhinga ‘i he kakai kuo fakafoki mai ki honau fonua mei Nu’usial mo ‘Aositelēlia pea koe kaveinga ia ‘oku matu’aki tokanga kiai hotau ki’i fonua ni he ‘oku tau kei hao.
'Oku tau fakatauange 'e kei hao pe 'a Tonga ni he 'e tu'u lavea ngofua hotau kakai ki he vailasi covid-19 fakatatau ki he fakamatala 'a e ngaahi lipooti fekau'aki mo e mo'ui fakamamani lahi.
