Hoko atu uike ni hono fetukutuku mai ‘a e kāinga Tonga mei muli ^Featured

‘Oku fakafuofua ko e tokolahi ‘o e kau pāsesé ko e toko 82 pea ‘oku ha’u fakahangatonu pē mei Brisbane ki Tonga ni.

‘I he ho’atā Falaite, ‘Okatopa 30 ‘e tu’uta mai ai ‘a e vakapuna hono ua mo e kau pāsese ‘oku laka hake hono tokolahi ‘i he toko 160 mei ‘Okalani, Nu’usila.

‘I he taimi tatau kuo ‘osi faka’atā foki ‘a e kau pāsese ‘e toko 141 na’a nau tu’uta mai ‘i he ‘aho 09 ‘Okatopa mei Christchurch, Nu’usila mei he Hōtele Tanoa hili ia ‘a e ma’u mai e ola ‘enau sivi Covid-19 ‘oku nau hao kotoa.

Fakatatau ki he fakamatala ‘a e Pule Ngāue ‘a e Potungāue Mo’uí ki he fakataha’anga ‘a e Kōmiti Fakafonua ki he Ngaahi Me’a Fakatu’upaké ‘i he ho’atā ‘o e ‘aho ni ‘oku faka’atā ‘a e kau pāsese mei Christchurch kenau kolonitini uike ‘e taha ‘i honau takitaha ‘api ka ‘oku ‘a’ahi faka’aho pē kinautolu ‘e he kau ngāue mei he potungāué.

‘Oku fe’unga fakakātoa mo e toko 400 tupu ‘a e kakai kuo ‘osi fetukutuku mai kinautolu mei he ngaahi fonua kehekehe ‘e nima.

‘I he palani ngāue ‘a e kōmití ‘oku ‘i ai ‘a e vakapuna mo e kau pāsese mei Brisbane pē, fakafuofua ki he ‘aho 18 ‘o Nōvemá pea taha mei ‘Okalani ‘i he ‘aho 19 ‘o Nōvema.

‘Oku palani mo e ngaahi vakapuna ki Tīsema pea pehe foki ki Sanuali ‘o e ta’u fo’ou.

“Ka ‘oku tau fiefia kotoa pē ‘i he ngaahi ‘aho ni, ‘oku kei hao pē ‘a Tonga ni mei he Covid-19,” ko e me’a ia ‘a e ‘Eiki Sea ‘o e Kōmiti ki he fakatahá.

“Pea ‘oku tau tuku kolōlia pē mo fakafeta’i ki he ‘Eiki Mafimafí ‘i he’etau kei hao,” ko e aofangatuku ia ‘a e ‘Eiki Minisitá.