'Ikai mo'oni fakamatala Setita Tui'onetoa 'oku folau mai kau pasese Air NZ he aho ni. ^Featured

Ko e fakamatala foki 'eni 'oku tuku mai 'e Setita Miller Tu'i'onetoa pea 'oku ne pehe ‘oku fakaheka mai ai ‘a e ngaahi naunau fakafaito’o ki he Covid-19 ‘a e Potungaue Mo’uí pea ‘e folau mai ai ‘a e Tokoni Palēmia mo e Ta’ahine Kuini he folau mai valapuna ko'eni.

Na'e toe pehe foki ‘e Setita Miller Tu’i’onetoa mei Nu’usila koe fakamatala ko'eni 'oku ne ma'u koe 'oatu meia Siaosi Pohiva koe Fakafofonga Fale Alea Tongatapu 1 mei Tonga ni.

Ko Setita Miller Tui'onetoa koe Pule Maloloo ia 'o e Letio Tonga ka na'e fakamalolo'i ki tu'a mei he ngaue pea 'oku te'eki ke mahino ha tu'utu'uni aofangatuku kiate ia.

Ko e tukuaki’i ko ení ‘oku ‘ikai ke mo’oni fakatatau ki he ongoongo mei he Pule'anga pea ‘oku ‘ikai ha taha pasese ‘e hifo mai he folau ko eni tukukeheange ‘a e ngaahi naunau fakafaito’o ki he Potungaue Mo’ui, na’e fakafou mai ‘i he alea mo e tokoni ‘a e Talafekau Lahi ‘a Nu’usila ki Tonga pae ‘oku uta mai 'a e tokoni ko'eni he vakapuna ko'eni.

Ko e vakapuna ni ‘e folau atu ai ‘a e kakai nofo Nu’usila, ‘Amelika mo ‘Aositelelia, na’a nau tukuvakā ‘i Tonga ni, lolotonga ‘a e taimi fakataputapui fefōlau’aki ‘a e Pule’angá.

‘Oku fie fakamahino heni ‘oku kei tauhi pē ‘a e Pule’anga ki he’ene tu’utu’uni ki he fakataputapui ‘o e fēfolau’aki vakapuna mei tu’apule’angá mo ha pasese ke folau ‘o tu’uta mai ki Tonga ni, tukukehe ‘a e ngaahi fiema’u fakafaito’o ki he Covid-19.

‘Oku kole atu ki he kakai ‘oku nau angamaheni ‘aki hono tukuange ‘a e ngaahi ongoongo ‘oku ‘ikai ke mo’oni mo totonu, ke ‘oua mu’a ‘e taki hala’i ‘a e kakai e fonua, he ‘oku mahu’inga ‘a e nofo melino ‘a e
fonua.