Katoanga Ma’alali Falangilangi Fakanofo Katinali 'o Soane Patita Mafi Featured
Nuku'alofa
11 'Epeleli, 2015
Ko e ‘aho ‘o e vale ‘ia tama ‘io koe ‘aho ‘o e kātoanga mo e mavava pea na’e pehē tofu pē ‘a e fiefia mo e patapata ‘a e Kāinga Lotu Siasi Katolika Loma pehē ki he kakai tokolahi ‘o e fonua na’a nau kau atu ki hono katoanga’i fakalangilangi mo fakafiefia’i ‘a e ’epoki koula kuo a’usia ‘e he Siasi Katolika Loma kae pehē ki he fonua katoa.
Ko e kātoanga ma’alali fakafonua foki ‘eni pea na’e ‘Afio tonu ai ‘a e Hau ‘o e fonua Kingi Tupou VI pehē ki he Ta’ahine Kuini Nanasipau’u Tuku’aho, Ta’ahine Kuini Fehuhu, Tama Pilinisi Kalauni Tupou To’a ‘Ulukalala, Pilinisesi Sinaitakala, Lord Fakafanua mo e Hou’eiki ‘o e Fonua ka e pehē ki he Hou’eiki Minisitā mo e kau fakaafe fakalangilangi tokolahi.
Ko hono toki faka’ilonga’i foki ‘eni ‘i he founga anga maheni ‘a e fonua ‘a hono fakanofo Katinali ‘o Soane Patita Mafi pea na’e teuteu kiai ‘a e fonua neongo na’e fakaha ‘e Katinali Mafi hili hono fakanofo ‘oku ‘ikai loto ke fahahela’i e kainga lotu moe fonua.
“Ko e anga pē foki ia ‘a e toka’i mo hono ‘ofa’i ‘e he Katinali fo’ou ‘a e kāinga lotu ka he’ikai tuku ai homau fatongia he ‘oku ‘ikai mea’i ‘e he Katinali ‘a e fiefia homau laumalie” ko e fakahā ia ‘e he taha ‘o e kau tangata’eiki ‘o e Siasi ka na’e ‘ikai loto ke fakahā hono hingoa.
Ko e kātoanga fiefia ‘eni pea na’e fakahoko pe ki he Kolisi ‘Apifo’ou ki he tafa’aki ‘oku ‘iloa ko Sā Mele. Ko e talitali lahi na’e fakahoko ‘e he kāinga lotu pea na’e lau afe ‘a e fu’u kakai ne nau fakatefua ke kaungā ma’alali ‘i he kuonga koula kuo a’usia ‘e he Siasi ‘o malama hake ai ‘a e fetu’uhopo ‘i he mala’e ‘o e lotu pea koe tapuaki ia ki he fonua katoa.
Na’e fakahoko ‘a e me’a talitali ‘e Lord Fakafanua pea na’e fakahoko foki mo e me’a ‘o fakafofonga e kainga lotu na’a nau lava mai mei ‘Aositelēlia pea na’e fakahoko foki moha me’a ‘a Katinali Mafi lolotonga ‘a e ouau Taumafa ‘o e ‘aho.
Ko e tumutumu ‘o e ‘aho ko e ngaahi faiva fakame’ite ‘a ia na’e faka’ali’ali ai ‘a e kainga lotu mei ‘Aositelēlia, Palokia Nuku’alofa, Kolisi Takuilau, Palokia Houma pea tā tuku ‘e he Palokia Ma’ufanga.
'Oku hā atu 'i lalo 'a e ngaahi 'imisi mei he Kātoanga Fiefia ko'eni.
