Lahi ange longoa'a kau Tonga nofo muli he Politiki 'i Tonga

'Oku malie lahi 'a e anga 'etau vakai ki he ngaahi talanga 'oku fekau'aki mo e ngaahi me'a faka-Politikale 'oku hoko 'i Tonga he ngaahi 'aho ni pea 'oku mahino mai foki 'i he vakai ki he mitia faka-sosiale koe lahi taha 'o kinautolu 'oku longoa'a mo ta'emalolo 'enau tohi mo fakaanga pehe ki he 'ohake 'enau ngaahi vakai ko hotau kakai Tonga nofo muli.

'Oku 'ikai puli foki ko Tonga ia 'oku 'ikai ke fu'u 'ilonga lahi ia ai hange koia koe hoha'a mo e longoa'a mai hotau kakai 'oku nau nofo 'i muli tautautefito ki Nu'usila, 'Aositelelia mo 'Amelika.

Ko e ngaahi fonua katoa ko'eni 'oku 'i ai 'a e ngaahi 'isiu lahi ai mo hono ngaahi pole fekau'aki mo hono fakakehekehe'i hotau kakai ai mo e ngaahi matakali kehe mo toe tokosi'i ange 'o tatau he mo'ui, ako, ngaue mo e ngaahi monu'ia mo e totonu kehekehe 'a ia 'oku 'ikai ke malava ke lave ai hotau kakai.

Ko e fehu'i foki ia 'oku fai e vakai ia kiai pe koe ha 'oku 'ikai kenau tau'i ai 'a 'enau ngaahi totonu he ngaahi fonua 'oku nau 'i ai pea nau longomo'ui hono tau'i mo 'eke 'a e ngaahi monu'ia 'oku totonu kenau ma'u.

'Oku lahi ange hono fakakehekehe'i hotau kakai 'i muli 'o kau ai 'a e 'ikai foaki ha faingamalie nofo, ma'ulalo ange 'a e vahenga ki he ngaue leipa, mamafa ange totongi ki he nofo mo e ha fua 'a e ngaahi pole kehekehe.

Ko e me'a malie foki ia 'e taha ke fakatokanga'i koe ni'ihi Tonga ko'eni 'oku lahi longoa'a mai mei he ngaahi fonua muli 'oku ma'u e fakamo'oni ia kiai koe tokolahi 'o kinautolu 'oku 'ikai ngaue ka koe ma'u mo'ui mei he ngaahi pepefiti pea mo e nofo pe 'i 'api pea ma'u faingamalie lahi kenau ngaue'aki 'a e mitia faka-sosiale hange koe facebook. 

Ko e kakai ngaue ia mo tokoni lahi mai ki hotau ki'i fonua 'oku nau mo'ua kinautolu he ngaue mo hono ako'i 'enau fanau pea nau kau atu ki he ngaahi me'a faka-komiuniti hange koe siasi pea 'ikai ngata ai 'oku mahino lelei ia kiate kinautolu 'a e ngaahi mo'oni'i me'a 'oku hoko.

'Oku mole ke mama'o hano tukuhifo 'a kinautolu 'oku longoa'a mai ki he ngaahi me'a faka-politikale 'i Tonga ka koe ni'ihi ko'eni koe kumi kakai pea 'oku nau lahi me'angaue'aki 'a e kakai Tonga 'i muli ki he'enau ngaahi fiema'u taautaha 'o 'ikai fakalao he taimi lahi pea iku ke mole ai e pa'anga 'a hotau kainga Tonga pea a'u foki 'a e fakatonutonu ki he Pule'anga.

Kuo tau 'osi mamata tonu ki he ngaahi fakamo'oni 'oku 'uhinga atu kiai 'a e fakahoha'a ko'eni 

'Oku 'ikai ngata ai ka koe fanongo talanoa mo e ma'u hala 'o 'ikai ha fakamo'oni fe'unga ki he ngaahi me'a 'oku nau talanoa kiai pea iku ki he maumau ai 'a e ngaahi tu'unga 'i he anga 'o e nofo tukukehe ange ai 'a e ma'u hala 'a e kakai 'oku fanongo kiate kinautolu.

'Oku 'i ai foki 'a e lea 'a e kau papalangi koe kapa 'oku ava 'oku lahi 'a e longoa'a 'oku ongo mei ai pea 'oku tau fakatauange 'e ngaue 'aonga 'aki 'e hotau ni'ihi ko'eni honau faingamalie 'i muli mo 'enau iviivi he politiki ke tau'i 'aki 'a 'enau ngaahi totonu he ngaahi fonua 'oku nau fakapaea ai pe koe fakahoko 'aki ha ngaue 'oku 'aonga ange kihonau ngaahi famili.

Toki hoko atu

Malo,

Tama Tonga Tu'u 'o Ngaue