Totongi 'Ova Kuata Miliona (260,000 TOP) Hono ‘Initaviu ‘o e Palēmia Ki he Forbes Custom Ka ‘Oku ‘Ikai koe Forbes Featured
Nuku'alofa, 24 Sune 2015. Lolotonga ‘a e kei hēhē’ia ‘a e kakai ‘o e fonua hono totongi ‘o e Pa’anga Tonga ‘e uakilu onomano ($260.000) ki hono ‘initaviu ‘o e Palēmia ‘o Tonga ‘e he Makasini Forbes kuo mahino mai mei he fakamatala falala’anga koe totongi ko’eni na’e fakahoko ia ki he Forbes Custom ‘a ia ‘oku ‘ikai fu’u mahino ‘ena fekau’aki mo e Makasini Forbes.
‘Oku mahino pe foki ‘a e kehekehe ko’eni he koe ‘amanaki ‘a e fonua ‘i hono ‘ohake mei he tafa’aki ‘a e Pule’anga lolotonga ‘a e feme’a’aki ki he Patiseti ‘a e fonua ko e Makasini Forbes.
‘Oku mahu’inga foki ke fakamahino ‘a e kehekehe ko’eni he ‘oku kehekehe pē ‘a e website ‘a e Forbes Custom ‘a ia ‘oku ma’u ‘i he tu’asila ko e http://www.forbescustom.com/ mei he tu’asila ‘a e Forbes Magazine ‘a ia ‘oku ma’u ia ‘i he tu’asila ko e http://www.forbes.com/forbes/ pea ko e ongo website kehekehe loua pe ia.‘Oku ‘asi foki ‘a hono ‘initaviu ia ‘o e Palēmia ‘i he website ‘a e Forbes Custom pea ‘oku ‘ulu’i tohi ‘aki ‘a e “The Beginning of Excellence”.
Kapau leva koe va’a pe ‘o e Makasini Forbes ‘a ia ‘oku ‘amanaki ki ai ‘a e tokolahi ‘o e fonua pea ‘oku fu’u fiema’u ke fakamahino ‘eni he koe kuata miliona ‘eni ‘o e pa’anga totongi tukuhau ‘a si’i kakai ‘o e fonua ‘oku fakahoko’aki ‘a e totongi ko’eni pea na’e ‘ikai fai ha ‘amanaki ‘e a’u ha ki’i fonua masiva mo si’isi’i ke ngāue’aki ‘a e kautaha ongoongo ‘oku ngaue’aki pe ‘e he ngaahi fonua mo’umo’ua mo ‘iloa he mala’e ‘o e Pisinisi ‘i Mamani.
Ko e Makasini foki ‘eni (Forbes) ‘oku fakataumu’a ki he Pisinisi neongo ‘oku lave pe ki he ngaahi tafa’aki kehekehe pe pea ‘oku hā pe ia ‘i he moto ‘a e Makasini Forbes ko e "The Capitalist Tool" ‘a ia ‘oku ‘uhinga ia koe “Me’angāue Faka Pisinisi pe Faka Kepitalisi”.
Na’e ‘ohake foki lolotonga ‘a e feme’a’aki ‘a e Fale Alea koe tu’uaki lelei ‘eni ‘o e fonua pea ‘oku hangēhangē ‘e totongi ‘a e fakamole ko’eni mei he Vouti ‘a e Takimamata. ‘Oku mālie ‘eni he koe talu ‘a e hoko hake ‘a e Pule’anga ko’eni mo hono fakamanatu mai ‘e he Palēmia ‘oku te’eki tenau fakahoko ha ngāue fēfē ka tenau toki kamata pe ‘i he kamata’anga ‘o e ta’u fakapa’anga.
‘Oku fepaki ‘eni mo hono totongi ko’eni ‘a e Pa’anga Tonga ‘ova he kuata miliona ke fakahoko’aki pe ‘a e fo’i ‘initaviu pongipongia ko’eni hili pe ‘enau hoko ‘o Pule’anga. ‘Oku fu’u mahu’inga fau ke muimui’i ‘a e ‘alunga ‘o e fa’ahinga fakamole ko’eni he ‘oku ‘ikai ha palani kiai pea ‘oku ‘ikai ke mahino hono mahu’inga faka Takimamata ‘o e fo’i ‘aliaki ko’eni hange koe taukave 'oku fakahoko 'e he Pule'anga.
Ko hono ‘omai ‘o e fo’i ‘uhinga koe tu’uaki faka Takimamata ‘oku ‘ao’aofia ia mo e natula ‘o e ngāue ‘a e makasini ko’eni. Ko e me’a pē ‘oku mahino mai ‘i he sekisoni ‘oku hā ai hono ‘initaviu ‘o e Palēmia ‘i he Forbes Custom ka ‘oku ‘ikai koe Forbes ‘oku hā ‘i ‘olunga ‘a e Economic Developmment/Promotion ‘a ia ‘oku ‘uhinga ‘a e sekisoni ko'eni ‘o fakatatau ki hono fakalea ki he Fakalakalaka Faka ’Ikonomika/Tu’uaki.
Ko e fehu'i leva pe kuo a'u 'a Tonga ki he tu'unga Langa Fakalakalaka Faka 'Ikonomika fe'unga ke tau kaka hake ai 'o kau hono talanga'i fakamamani lahi 'a e kaveinga ko'eni mo tu'uaki pe 'ikai?. 'Oku fiefia foki 'i he taimi tatau 'a e Kautaha mitia ia ko'eni he 'oku mahu'inga foki ke ma'u 'enau seniti ia 'a kinautolu.
‘E fakafiefia leva kapau ‘e malava ke tuku mai ‘a e puipuitu’a hono fakahoko ‘o e tu’uaki ko’eni he ‘oku totonu ke makatu’unga ia mei he palani tu’uaki (marketing strategy) pea na’e fakahoko hano savea’i ke ‘ilo hono ola moe ngaahi fiema'u ki mu'a pea fakahoko ha tu'uaki he levolo ko'eni. 'I he taimi tatau 'oku 'ikai puli mei he kakano 'o e 'initaviu ko'eni ko hono tu'uaki pe 'eni 'o e Palemia mo hono Pule'anga lolotonga ia 'oku te'eki ho'ata mai ha ola 'o 'enau 'i he fohe fakatatau ki he taimi na'e fakahoko ai 'a e 'initaviu mo e tu'uaki ko'eni.
Kaikehe 'oku fu'u fiema'u ke 'ilo pe koe levolo fiha 'eni 'o e Makasini Forbes 'oku 'i ai 'a e Forbes Custom kapau 'oku 'i ai ha fekau'aki he 'oku 'ikai ke mahino 'ena tu'u pea 'oku mahu'inga ke 'ilo kiai e kakai 'o e fonua. Kapau leva 'oku na kehekehe pe kinaua pea koe toki me'a faka'ulia 'eni.
 Hono ‘Initaviu ‘o e Palēmia Ki he Forbes Custom Ka ‘Oku ‘Ikai koe Forbes "Pin It")
6 comments
-
Ne fai e 'a'ahi ki he Website a e Forbes, koe'uhi ko e 'asi ai e background e tama tuumalie koeni ko Donald Trump aee oku feinga fili Palesiteni i Ameika lahi, fiu hono kumi etau PM, pea teu toki toe vakai ha mahina e 700 mei heni na'a 'asi hake e! Maalie ee!
-
Na'a ku toki lau 'aneafi 'a e nusipepa ko e Talanga 'oku toki 'asi ai e ki'i tu'uaki na'e fai.
'Oku ou fakalilifu'ia, 'oku 'ikai ke 'iai ha fa'ahinga lea ia tene fakae'a mai pe faka'asi ha tu'uaki. Pea koe konga Q & A 'oku meimei 'alu kehe 'a e tali ia mei he fehu'i, hala ha fetaulaki. Ka kou tumu'ia he kei lava 'a e PM mo 'ene kapineti o ngauee ta'e teteki ki he 'ave koeni 'a e fu'u pa'anga tukuhau a e fonua o li'aki pehe'i. Ko fe 'a e 'ofa fonua? Ko fe 'a e toka'i? Ko fe 'a e tau'i e faihala? Pea me'a faka'ulia kapau ko e totonu eni 'a e tangata ke ne faka'auha 'a e fa'ahinga o e tangata, fakapo! Te tau i fe? -
Malo Tama Nomuka.
'Ikai keu lava 'o view lelei 'a e fo'i tu'uaki ka na'e 'iai 'a e tokotaha na'a ne 'ai hake ko e meimei tu'uaki pe ia o e PM. Ka kou fakakaukau atu kapau 'oku pehee pea 'ave pe ia ke totongi 'e he famili o e PM. He koe fo'i 'oatu koena e pa'anga 'a e fonua ke totongi 'aki hono vikiviki'i ia o e PM taautaha ko e mala'ia lahi ia 'e hili hono famili mo e kakai kotoa 'oku nau kaunga kiai, pea ka hoko, poho ee poho ee! -
Oku 'asi he issue Forbes 2015 Investment Guide Special Issue. Na'a ku fakatau e copy ko ena pea oku asi he peesi 69 mo e 70 http://www.amazon.com/Forbes/dp/B000HA4FKO/ref=sr_1_1?s=magazines&ie=UTF8&qid=1435982230&sr=8-
1&keywords=forbes+kindle -
Faka'amu ange mai 'eau ne tuku mai ha fo'i sample 'o e tu'uaki 'oku fai ke mu'a sio kiai e kakai, pea toki fai e fakamole ko'eni. Na ko ha tu'uaki eni ia tetau melemo ai he moana kae si'i 'ave atu kiai e pa'anga tukuhau a e kakai. Pea ko e me'a mahu'inga taha ke manatu'i 'e he Kapineti, ko 'enau fetakai koeni mo e kakava pea ko e me'a kotoa pe kuopau ke 'iai hano tuha. Kae mahulu hake kenau manatu'i 'e 'iai 'a e Pule'anga 'e hoko mai, na'a toki hoko mai e Pule'anga koia 'o faingata'a'ia he fakaehaua 'a e Pule'anga ia koeni ...
-
Fakatatau ki he feme'a'aki 'a e Fale Alea na'e fkmahino ai he'e Minisita Pa'anga 'Aisake Eke mo e Palemia 'Akilisi Pohiva 'oku te'eki ai ke totongi ha me'a 'i he fk'eke'eke ko eni. Ngalinagli 'oku lohiaki'i 'ehe minisita pa'anga mo e palemia e kakai 'o e fonua. He ko eni kuo 'osi totongi 'a e pa'anga ia. Malie pea toe lesoni...