Fokotu'u ki ha Fili Fakaha loto (VONC) - Ta'efalala'anga 'a e Palemia ^Featured

Tangata’eiki,

Kuo fakaha ‘e Lord Vaea tenau fokotu’u mo e hou’eiki nopele ‘i Fale Alea ke fakahoko ha Fili Fakaha Loto (VONC), he ‘oku ta’efalala’anga ‘a e tataki ‘a e Palemia Hon. ‘Akilisi Pohiva. Ko e taha ‘eni ha me’afua fakatemokalati fisifisimu’a, ke fakapapau’i ‘e taliui mo ho’ata ma’u pe kitu’a ‘a e fakahoko fatongia ‘a e Palemia mo ‘ene Kapineti ki he kakai na’a nau fili kinautolu.

Kuo tuku mai ‘e Lord Vaea ha ngaahi ‘uhinga malohi ke fakahu ‘aki ‘a ‘enau fokotu’u teu Fili Fakaha Loto. Pea ‘oku mahino ngofua mo malohi ange ‘a e ngaahi ‘uhinga ‘oku ‘omai ‘e Lord Vaea, ‘i he ngaahi ‘uhinga na’e fakahuu ‘aki ‘e he Palemia Hon. ‘Akilisi Pohiva ‘ene fokotu’u Fili Fakaha Loto ‘i he 2012, ke fakahifo ‘aki ‘a e Palemia he taimi koia, ‘a Lord Tu’ivakano.

Kaneongo kotoa ‘a e malohi mo e makatu’unga lelei ‘a e ngaahi ‘uhinga, ‘e tomu’a fiema’u ia ke vakai’i ‘a e tu’u fakafika ‘a e ngaahi fa’ahi ‘e 3, pe ‘e malava ke ma’u ‘e he Fa’ahi ‘a e hou’eiki Nopele ha toko 13 kanau ikuna. Koe tu’u leva ‘eni ‘a e ngaahi Fa’ahi.

Fa’ahi Tu’u Tau’ataina (Toko 7)

‘Aia ko (1) Siaosi Sovaleni, (2) Fe’ao Vakata, (3) ‘Aisake Eke, (4) Saia Piukala, (5) Poasi Tei, (6) Samiu Vaipulu, (7) Viliami Manuopangai.

Fa’ahi ‘a e Hou’eiki Nopele (Toko 9)

‘Aia ko (1) Lord Vaea, (2) Ma’afu, (3) Tu’ivakano, (4) Nuku, (5) Tu’i’afitu, (6) Tu’iha’angana, (7) Tu’ilakepa, (8) Tu’iha’ateiho, (9) Fusitu’a. Tukukehe ‘okapau ‘e Sea ‘a Tu’ivakano he taimi paloti, pea hikinima ‘a Ma’afu ma’ae Palemia pea tenau toko 7 pe. Ka he’ikai palopalema ia, he‘e ala fetongi hake pe ia ‘e Samiu Vaipulu mo Viliami Manuopangai, ke ma’u ‘a e toko 9, ka’e holo hifo ai ‘o toe toko 5 pe ‘a e Fa’ahi Tu’u Tau’ataina.

Fa’ahi ‘a e PATOA moe kau poupou ki he Palemia (Toko 10)

‘Aia ko e (1) Palemia ‘Akilisi Pohiva, (2) Semisi Fakahau, (3) Pohiva Tu’ionetoa, (4) Tevita Lavemaau, (5) Vuna Fa’otusia, (6) Semisi Sika, (7) Mateni Tapueluelu, (8) Penisimani Fifita, (9) Veivosa Taka, (10) ‘Akosita Lavulavu.

‘I he’ene tu’u pehee leva, ‘e toe pule’i pe ‘e he toko 7 (pe 5) tu’u tau’ataina, ‘a e Fili Fakaha Loto ‘e fai. He koefe pe fa’ahi tenau nga’unu kiai, koia ia ‘e ikuna. Kaikehe, ka malava ‘o ikuna ‘a e Fa’ahi ‘a e hou’eiki Nopele, ‘aki ha nga’unu kiai ‘a e kau tu’u Tau’ataina, ‘e toe ha mahino ange ai ‘a e natula ‘o e Pule’anga Kafataha na’e fa’a tu’uaki mo sio loloa kiai ‘a Dr Sitiveni Halapua he kuo hili.

He koe tu’u ‘a e Pule’anga ‘o e ‘ahoni, ‘oku lolotonga Pule’anga Kafataha hono fa’unga. He ‘oku ‘iai ‘a e kau Paati PTOA, ‘iai mo e kau tu’u Tau’ataina, pea huluni ai ‘a e moe nopele ko Lord Ma’afu. Pea tetau hokohoko Pule’anga kafataha atu ai pe ‘i he lele atu ko ‘eni, kae ’oua leva kuo tau liliu ‘o fakalao’i ‘a e Fili Faka-Paati.

Kae toki malava ke fili ‘a e Palemia moe kotoa ‘o ‘ene kau Minisita, mei ha Paati pe ‘e taha, ‘o ‘ikai ha toe fafakatau’aki hoosi kimu’a he lova. 

 ‘Oka ikuna ‘a e Hou’eiki Nopele ‘i he Fili Fakaha Loto ko ‘eni, pea ‘e kei hokohoko atu ai pe ‘a e Pule’anga Kafataha. Ka’e fiema’u ha Palemia ‘oku falala’anga ange, moha kau Minisita ‘e toe  tau’ataina ange ‘enau fakahoko fatongia.  ‘Oku ‘ikai tetau fiema’u ha Pule’anga ‘oku fa’u ‘aki ha laumalie fesiosiofaki, lotokovi, filifilimanako, pea fai tu’utu’uni fakatikitato, mo hala ‘i ha policy pe palani ngaue pau.

Ka ‘oku tau fiema’u ange ha Pule’anga ‘oku manako ki he pule lelei, ngaue loto tau’ataina, ‘ikai hikisia, pea ho’ata kitu’a ‘enau fakahoko fatongia ‘aki ‘etau tukuhau.

Kuo pikoua e tu’a ‘o e kakai masiva he tanaki tukuhau, pea li’ekina e kaha’u e fanauako, to’utupu mo e ni’ihi ta’ema’ungaue. ‘Oku ta’emahino ‘a e fakalelei vahenga ‘a e kau ngaue fakapule’anga, pea kuo fakautuutu ‘a e pule kovi moe faihala, kae tu’uenoa ‘a e fakamaau totonu moe pule ‘a e lao, ‘o makatu’unga mei ha ngaahi faitu’utu’uni ke tuku fakatafa’aki ‘a e lao kae takitaha kumia ‘ene lelei fakafo’ituitui.

‘I hono fakalea mahino ange, kuo siva ‘etau ‘amanaki ki he Pule’anga na’e taku koe Pule’anga fakatemokalati ‘o e Kakai, ‘o makatu’unga ‘i he ta’efalala’anga ‘a e Palemia, pea kasia ai e toenga ‘o ‘ene kau Minisita. ‘Oku tau fiema’u leva ha fakafo’ou kei taimi, telia na’a fu’u tomui. Koe anga leva ‘eni ‘eku sio fakaangaanga ki ha ni’ihi ‘i ha Kapineti fo’ou, ‘okapau ‘e ikuna e fa’ahi ‘a e Hou’eiki Nopele.

1.    Lord Vaea - Palemia mo Minisita Ki Muli & Fefakatau’aki.
2.    Siaosi Sovaleni - Tokoni Palemia mo Minisita ki he MEIDECC.
3.    Fe’ao Vakata - Minisita ki he Ngaahi Ngaue Fakalotofonua & Sipoti (MIA).
4.    Poasi Tei - Minisita ki he Ngaahi Pisinisi ‘a e Pule’anga (PE).
5.    Saia Piukala - Minisita Mo’ui (Health).
6.    ‘Aisake Eke - Minisita Pa’anga mo Palani Fakafonua.
7.    Samiu Vaipulu - Minisita Lao & Fakamaau’anga.
8.    Lord Tu’i’afitu / Viliami Manuopangai - Minisita Ngaahi Ngaue Lalahi & Takimamata.
9.    Lord Nuku - Minisita Polisi, Leipa & Fefakatau’aki (Commerce).
10.    Lord Ma’afu - Minisita Fonua & Taumalu’i Fonua ‘a ‘Ene ‘Afio.
11.    Lord Fusitu’a - Minisita Tanaki Pa’anga Humai & Kasitomu.
12.    Lord Tu’iha’angana - Minisita Ngoue, Toutai, Me’atokoni & Vaota.

Koe anga pe ‘ena ‘o e sio fakaangaanga he taimi ni, ka ‘e malava pe ke toe ki’i feliuliuaki si’i, he ‘oku te’eki ai mahino e tu’u ‘a Lord Ma’afu, pe’e hikinima kife’ia. Ka ‘okapau tene fili ki he Fa’ahi ‘a e PATOA ‘o nau fo’i, pea ‘oku totonu ke ‘oua ‘e kau ia he Kapineti Fakaangaanga ‘a Lord Vaea. 'E hoko leva koe Minisita Fonua & Savea ‘a Tu’i’afitu ia, pea hu hake Viliami Manuopangai ia ‘o Minisita Ngaahi Ngaue Lalahi & Takimamata.

Pea ka hikinima ma’ae Hou’eiki Nopele, pea ‘e malava ke kei hoko atu pe ‘i he Minisita Fonua & Tau Malu’i Fonua, kae holomui a Viliami Manuopangai.  

Faka’apa’apa atu,

Saikolone Kiora, NZ.