Taki ua e me’alele, tohi pangikē ‘i ai e $10,000 mo e fale mei papalangi Featured
Kolomu Helefilo & Fakaoli
Taki ua e me’alele, tohi pangikē ‘i ai e $10,000 mo e fale mei papalangi
Kuo tau situ’a atu foki mei he fili si’i ‘a e Vava’u 16 pea mālō kuo lava atu ia mo hono ola. ‘I he taimi tatau ‘oku fie vahevahe atu ‘e he Kolomu ni ‘a e talanoa mo’oni ko’eni he ‘oku faka’ofa pea ‘oku toe fakalele loto mo fakaoli ‘a hono lohiaki’i ‘o si’i kakai ‘o e vahenga ni.
‘Oku ‘ikai ke fo’ou foki ‘a e founga kemipeini na’e fai he fili si’i ko’eni mo ia na’e fakahoko ki mu’a ‘i he fili ‘o e 2014 pea na’e toe fanongo mo e Tonga kotoa he ngalu’ea mo e mītia ki he founga kemipeini tatau mo e palomesi tatau. ‘Oku tekeutua ‘o hange ko Kao ‘eni pea ‘oku ‘ikai ke fiema’u ke tau toe kumi fakamo’oni he ‘oku fakatupu kata mo faka’enekete ka ‘oku fu’u faka’ofa.
Lolotonga ‘a e ‘ikai ke hoko ‘a e ngaahi palōmesi na’e fakahoko he 2014 pea iku tuli mo e motu’a’i paka mei Fale Alea ko e faihala mo e kai pa’anga kuo kei talitali lelei pe ‘e he ki’i vahenga ni ia ke tu’ulāhoko ai pe hono fakatekiteki kinautolu ‘aki ‘a e matala’i’akau ko e loi mo e faka’amanaki. Na’e fai ‘a e palōmesi mo e kole ‘a e paka mui mo e motu’a’i paka lolotonga ‘a e kemipeini ke tukuange ‘a e toenga teemi ko’eni ke faka’osi ange ai mu’a ‘a e misiona mo e vīsone ‘a e motu’a’i paka.
“Ko e ‘ai ke faka’osi ‘a e misiona kakaa mo e loi?...’oiaue hoto fakapō he kakai vale mo ta’elotu ka nau folofua e takainga loi”, ko e fakaofoofo hake ia ‘a e taha ‘o e kau fefine mei Tukulalo ka na’a ne si’i a’u foki ‘o kau he sivi faka-Pule’anga he taha ‘o e ngaahi Kolisi ‘o Vava’u.
“’Ikai ‘e ‘osi e teemi ia ko’eni kuo mau taki ua e me’a lele pea ‘i ai mo ‘emau tohi pangikē ‘e a’u ‘o $10,000 ‘a e pa’anga ‘e fakahū ai pea langa mo homau fale” ko e si’i tauto’e hake ia ‘a e taha ‘o e kau lalanga mei he Vahe Hahake ka na’a ne si’i 1B pē he lautohi si’i pea hiki hangatonu hake pe mei ai ki he kapa tohi lālānga.
Na’e toe hēhē’ia foki ‘a e tokolahi ‘o e vahenga ni tokua ‘e to’o kotoa ‘a e ngaahi fale faka-Filipaini he vahenga ni kae fetongi’aki ‘a e ngaahi fale mei papalangi pea na’e tuku mai foki ia he ngaahi malanga ‘a e paka mui kae pehe ki he pepa na’e tufa ki he kakai ‘o e vahenga ni.
“’Oku mate homau mā he ‘asi holo ‘i Tongatapu ko e tala ai pe ‘a e vale mo e pakupaku homau vahenga,” ko e fakatalanoa mai ia ‘a e taha ‘o e kau mo’unga’i tangata mei he vahenga ni kuo fuoloa ta’u ‘ene fai fatongia he Pule’anga.
“Io ‘oku tatau mo au he ‘oku lau mai ‘a e kau Neiafu pea ‘oku fakamā neongo na’e ‘ikai ke mau kau kimautolu he vale ka ‘oku afuhia kotoa ai e vahenga,” ko e fanafana mo malimali mai ia ‘a e tangata mei he Vao Lahi.
"Ha'u aa e moa Ha'apai ia 'o 'u'ua 'i Vava'u ka tau kai 'etautolu e toenga niu kuo tatau....tau manatu kia Puli'uvea" koe fakahua mai ia 'a e tangata matu'otu'a mei he Lolopaongo mo'ene kata.
Toki hoko atu.....
15 comments
-
Taki ua mo e loli maka kae toki claim mei he pa'anga 'a e Pule'anga. 'Ikai kenau 'ilo koe maka kotoa 'oku tanu 'aki hinau ngaahi hala 'oku toho mei he falepa'anga pea koe 'uhinga ia 'oku 'oho holo ai 'a e Palofesa loi he 'oku ma;u 'ene pa'anga ai mei hono fuu maka.
-
Na'e fai e fetukutuku mei Filipaini ki Papalangi 'ane fe?....'Io VV16?...malie pea lelelelelesososo
-
'Oku tau tali 'ekitautolu 'a e ola, ka oku ikai ketau hanganaki atu ki hono nunu'a. He oku ikai ilo ehe Kainga ko'enau fili fakavalevale 'e uesia kotoa e ngaahi vahenga fili 'o Vava'u, he 'e ha'u 'a Sita ia 'o fusi e ngaue ki hema he lolotonga e lele 'i mata'u 'a e ngaue. Pea ka 'i ai ha kole tokoni ma'a Vava'u he'ikai tali ia 'i he 'ikai lele fakataha 'a e ngaue.
-
Ko e anga 'ena 'enau fakakaukau pea koe 'ai ketau toe fefe'i?....tau tali pe mu'a 'a e ola pea tau sio pe koe ha 'e hoko..
-
'Oua 'e toe ta'ofi pea tuku ho'o mou kaunoa. 'Ai moutolu Vava'u 16 ke ngali na'e 'ikai mole ha peni 'uli'uli 'e taha hono ako'i kimoutolu....'ioooo...
-
Ko e lohiaki'i pe kae fai atu pe. 'Oku 'alu fakataha pe moe kovi 'a e loto ki he kakai lelei 'oku tonu kenau fakafofonga'i 'a e vahenga fili ni. Kuo to lalo 'a Vava'u he ngaue 'a e kakai sio kita ko'eni. 'Oku sai he tenau 'a pe 'o 'ilo..
-
'I he fili 'a Holonga koe kainga 'o e Tu'i 'oku fakatupu fifili he na'e mahino 'a e 'ikai tali 'e he Tu'i 'a e kole appoinment 'a e motu'a'i paka pea na'e tu'olahi 'ene feinga mo e 'ikai tali 'e he Tu'i ke sio kiha taha 'oku ne kaka'i e kakai moe fonua. 'Oku ake e manatu ki he tau 'akapulu 'a Holonga mo Kameli koe tau'i e pale pa'anga. Na'e va'inga kovi 'a Holonga pea to ai lea 'a e To'a mei Kameli 'o pehe "Kameli mou omi moutolu ki tu'a he koe 'oho 'a e pakupaku 'oku 'ikai hano ngata'anga". 'Oku ngali pehe pe mo e fili 'a e kainga mei he 'api 'o e Tu'i pea ngalo mo e kelekele ia 'oku nau feta'utu'i ai.
-
Vava'u 16 kuo mate homau ma ho'omou fili pea fakamalo atu ki he kakai 'e toko 1000+ na'a nau fili kia 'Ipeni, 'Atalasa mo Viliami ho'o mou maama 'o afe mei he luo kuo tokonaki 'e he ongo Lavulavu ma'a kimoutolu.
-
Kataki Falakesi 'oku 'ikai ke mau fiema'u i Niua ni e mahaki koe na 'o Haapai 13 kuo pihia ai a Vv16 koia kole atu ke tu'usi pe 'o le'ei atu ki Haapai he ko 'enau fanautama pea he'ikai kenau mamahi nautolu he koe fiema'u topai tatau pe 'ae kau tatakoto pea poupou atu ke ha'u a Kolea 'o 'ahi'ahi 'atomi he ongo vahenga koena hhh.
-
Peheange mai na'e 'iai ha fu'u hele tofifonua ke tofi'i atu a Vv16 ia 'o fakapona atu ki he vaha'a 'o Niua mo Ha'amoa, pea tala ki Iran ke tesi enau veve'i 'atomi ai ke ma'u ha silini 'a Tonga ni ke fakalele 'aki e sipoti. He ko e tu'u he taimi ni 'oku 'ikai kenau toe mahu'inga 'ia kinautolu 'i he'enau mo'ui, kuo nau fili tavale pea nau maalie'ia noa'ia, faka'ofa'ia noa'ia. 'Uha fa'o hifo ki Vv16 kiaiiii ... 'ioooo