'E kei tokoni 'a PNG ki he Sipoti 'a Tonga ka 'ulungia 'a Peter O'Neill? Featured
Palēmia Papua Niukini Peter O’Neill
18 Siulai, 2016. ‘Oku ‘i ai ‘a e teteki ‘a e tokolahi ‘o e kau politikale pehe ki he tokolahi ‘a e kakai ‘o Papua Niukini mo e ngaahi fonua kaungā’api ki he ‘amanaki fili fakahāloto ke fetongi ‘a e Palēmia Peter O'Neill mei he lakanga Palēmia ‘o e fonua.
Na’e a’u foki ‘o lau mahina ‘a e laka fakahāhā ‘a e fanau ako ‘o e ‘Univesiti ‘o Papua Niukini pea pehē ki he ngaahi ako’anga ma’olunga ange ‘e ni’i hi pea na’e mole foki mo e mo’ui ‘i he ta’efiemālie ai pe ki he taki ‘a O'Neill.
‘Oku a’u mai ki he lolotonga ni kuo tukungāue mo e kau ngāue ‘a e kautaha folau vakapuna Air Niugini ‘i he fonua ‘o a’u ki he kau pailate ‘i he’enau loto ke tukuange aa ‘e he Palēmia ‘a e lakanga. Koe ta’efiemalie moe fakamoveuveu sivile ‘a e kakai ‘oku tu’ulāhoko pe ‘o a’u mai ki he ngaahi ‘aho ni.
Kuo mahino foki mei he Fale Alea Papua Niukini ‘e fakahoko ‘a e fili fili fakahāloto ke tukuhifo ‘a fili O’Neill mei he lakanga ‘i he Falaite ‘o e uike ni ‘a ia ko e ‘aho 22 ia ‘o Siulai.
‘Oku mahino foki ko hono tukuaki’i ‘eni ‘o O'Neill ki he pule kovi mo e ‘ikai kene malava ke tataki lelei ‘a e fonua ‘o kau kiai mo hono ngāuehala ‘aki ‘a e mafai mo e pa’anga ‘a e fonua. Kuo ‘i ai foki ‘a e kolosi mei he Fa'ahi ‘a O'Neill ‘i he Fale Alea ki he tafa’aki ‘a e Fa’ahi Fakaanga ‘a ia ‘oku taki ‘e Don Polye.
‘I he taimi tatau ‘oku malohi pē mo e feinga ‘a e Fa’ahi ‘a e Pule’anga ke nau kei puke pe 'a e fatongia Pule'anga pea koe taimi mālie lahi ‘eni ‘i he feinga malohi ‘a e ongo tafa’aki ‘a ia ‘oku fa’a ui 'i he mala’e ‘o e politikale ko e fakatau hoosi (horse trade).
‘Oku ‘i ai foki ‘a e hoha’a heni ‘a Tonga ni he ‘oku ‘i ai ‘a e fakatatali ki he tokoni lau miliona ‘a e Pule’anga ‘o O’Neill ki hono langa ‘o e mala’e sipoti Teufaiva ‘i he teuteu ki he sipoti ‘a e pasifiki 2019 ‘oku ‘amanaki fakahoko mai ki Tonga ni.
‘Oku malava foki kapau ‘e mole ‘a e Palēmia meia O’Neill ke ‘ikai malava ke ma’u mai ‘a e tokoni ko’eni he ‘oku lahi mo e ngaahi fiema’u fakapa’anga fakalotofonua ia ‘a Papua Niukini pea ‘oku kaunga lahi ia ki he tupu’anga ‘o e moveuveu ‘i he fonua.
Ko e ngaahi teteki fekau'aki mo e tu'unga 'o e tokoni ki Tonga ni mo e hoko atu 'a e Pule'anga Papua Niukini 'e veteki kotoa ia hili 'a e fili fakahāloto (vote of no confidence) 'o e Falaite 22 'o Siulai.
1 comment
-
Ta oku kei monu'ia 'a Tonga ni 'oku nau fakahaloto moulu pe, te'eki ke fu'u fefena e mamahi 'ia Akilisi o hange ko e mamahi 'a e kau Papua. Ka koe me'a pe na'a tootu'a e takaloto 'a e mamahi 'a Tonga ni 'o toe vela ha feitu'u ia 'i he Kolomu'a.
Kaikehe, tala atu ke 'oua toe fai mai ha tokoni he 'oku tau tu'umalie pe kitautolu na'e 'osi lea aki pe ia e he Minisita Paanga i Fale Alea 'oku lahi pe Pa'anga ka ko e ta'ekole mai. Pea ko ena kuo hiki e to'o tukuhau ia he ngaahi vahenga a e kau Ngaue FakaPule'anga, toe apply mo e fatmeat tax, ko e ngaahi fakafetongi ia ki he pa'anga tokoni 'oku 'ikai lava mai mei Papua. MAALIE.