Koe ha e tukunga ‘oku ‘iai pea ‘e iai ‘a e Poate Takimamata ‘a Tonga (Tonga Tourism Authority)? ^Featured

13 ‘Epeleli, 2016

Tangata'eiki,

‘Oku ou kole keu faka’apa’apa atu mu’a kae tu’u atu mu’a ‘eku kii hoha’a ko'eni.
 
Koe fatongia mahu’inga taha ‘oe Poate Takimamata, ‘o fakatatau kihe lao (Tonga Tourism Authority Act 2012) ke fakamaketi’i ‘a Tonga ni ki muli ke fakatupulekina hono manakoa ‘o Tonga he’e kau folau ‘eve’eva.

Hange koe kaveinga ‘eku tohi ni. Koe fifili ‘eni pe koeha e tukunga ‘oku ‘iai e Poate Takimamata ‘o Tonga.

Ne kamata foki e lele mai (operation) ‘ae Poate Takimamata mei Sanuali 2014 pea koe ‘osi ‘eni e ta’u e ua me ai.  Ne fakanofo (appoint) e Pule Lahi ‘o kamata ngaue mei Sanuali 2014 pea me’apango ia ne fakafisi (resign) pe ia ‘i ‘Epeleli 2015, pea toe fakafisi foki moe Pule Maketi ia (Marketing Manger) he 2015 aipe.  

Ko ‘ene tu’u koe he taimi ni, ‘oku ‘ikai ke ‘iai ha polokalama fakamaketi ‘ia ‘ae Poate e lele ‘i muli talu meihe ta’u kuo ‘osi (2015) ‘o a’u mai kihe taimi ni. ‘Ikai koe ia pe, ‘oku ‘ikai ke ‘iai ha Pule Lahi (General Manager) pe koha Pule Maketi (Marketing Manager) ke fakalele e ngaue. Lolotonga ko ia, ‘oku ‘ikai ha mai ha ngelengele ia ‘ae Sea moe Poate ke kumi mai ha Pule Lahi moha Pule Maketi ke fakalele e ngaue.

‘Oku ‘iai nai ha ‘uhinga lelei ki hono tolotoloi hano kumi mai e Pule moe Pule Maketi? Pe ‘oku poto ange pe Sea ia moe Poate hono fakalele e ngaue? ‘oku mahu’inga e kaveinga ko ‘eni he koe takimamata moe kakai e fonua ‘oku nau fua e kanongatamaki hono ‘ikai ke fakahoko e fatongia fakamaketi ‘o Tonga ki muli. Kae kehe koe fifili ia pe koeha koa e me’a ‘oku hoko kihe Poate Takimamata.

Ne fakanofo (appoint) e kau Talekita kihe Poate, fakafuofua ki Me 2013 pea ‘e ‘osi ‘e nau Konituleki ki Me ‘o e ta’u ni (2016). Ne ‘iai e kau Talekita ia ne nau fakafisi (resign) he ta’u kuo ‘osi (2015) ‘o kau ai e Sea, pea toki fili pe ‘e Lavulavu ia pea fakanofo (appoint) he’e Kapineti e kau Talekita ke nau fetongi (replace) e kau Talekita ne fakafisi, kau ai mo e sea fo’ou.

Koia ai,   ‘e ‘osi e konituleki ‘ae kau Talekita ‘i Me (mahina kaha’u) ka ‘oku ‘ikai ha mai hano tu’uaki mai e fatongia Talekita ke fetongi ‘aki e kau Talekita lolotonga. Pe ‘e toe ‘ai pe ha fakanafala ia hange koe fili pe ‘e Lavulavu ia e Sea lolotonga moe kau Talekita ‘e tolu kehe ‘o toki fakahu kihe Kapineti.

‘Oku ‘iai e founga ke fai ‘aki e ngaue ‘o hange koe fa’a malanga ‘oku tau fa’a fanongo ai “ke ho’ata ki tu’a e ngaue” kae ‘oua e fakapone mo Fakapulipuli ‘o hange koia ne hoko. Koe fifili ai pe, koe ha e me’a ‘e hoko he ‘osi (expire) ‘ae kau Talekita lolotonga he mahina kaha’u? ‘E lele ta’e Talekita pe Poate ia? ‘e faka nofo fakanafala pe ha kau Talekita fo’ou ia?

‘Aia ko ‘eku fifili;

1.    Koe ha koa e me’a ‘oku hoko kihe Poate Takimamata ‘ihe lolotonga ni, ‘ikai ke ‘iai ha polokalama fakamaketi, ‘ikai ‘iai ha Pule Lahi pea ‘ikai ke ‘iai ha Pule Maketi?

2.    Koe ha koa e me’a ‘e hoko kihe Poate Takimamata he ‘osi (expire) ‘ae konituleki ‘ae kau Talekita lolotonga ‘ihe mahina kaha’u (Me)?

Lolotonga ko ia ‘oku ma’u he’e Poate Takimamata ‘ae pa’anga ‘e TOP$1.5 miliona meihe Pule’anga, he ta’u, ke fakalele ‘aki e ngaue.

Ofa pe ‘e lava ha taha ‘o tokoni mai.

Malo

Ofakimuli Sovea