Fakanofo 'a Siale 'Akau'ola ki he lakanga Minisitā Mo'ui
Mei To'ohema Dr. Siale 'Akau'ola 'Eiki Minisitā Mo'ui fo'ou 'a Tonga mo Dr. Saia Ma'u Piukala 'Eiki Minisitā Mo'ui Malōlō
1 Fepueli 2023. Kuo fakanofo 'a Dr. Siale 'Akau'ola 'o Kanokupolu ki he lakanga ko e 'Eiki Minisitā Mo'ui 'a Tonga hili ia 'a e fakakafisi 'a Dr. Saia Ma'u Piukala mei he lakanga ni kae hoko atu ki he fatongia fo'ou 'i he Kautaha Mo'ui 'a Mamani.
Na'e fokotu'u atu foki 'e he 'Eiki Palēmia 'o Tonga Hon. Hu'akavameiliku 'a Dr. 'Akau'ola ki he lakanga ni 'i he uike kuo maliu atu hili ia 'a fakafisi 'a Dr. Piukala pea na'e fakamo'oni Huafa ki ai 'a e Tama Tu'i Tupou VI 'i he 'aho 27 'o e mahina ko Sanuali.
'Oku 'ikai foki ke sola ha taha kia Dr. 'Akau'ola he kuo ta'u lahi 'ene fakahoko fatongia 'i he Potungāue Mo'ui pea na'a ne hoko ko e CEO 'a e Potungāue Mo'ui he ngaahi lahi kimu'a pea ne toki malōlō mei he Potungāue Mo'ui hili ia 'a e lava kakato hono taimi.
Na'e fokotu'u foki 'a Dr. Saia Ma'u Piukala kene hoko koe Talēkita Faka-Vāhenga 'i he Kautaha Mo'ui 'a Mamani ki he Hihifo 'o e Pasifiki.
'Oku mahino mai foki 'oku 'i ai mo e lakanga Minisitā 'e ua kuo lau mahina hono fokotu'u atu 'e he 'Eiki Palēmia ki he Tama Tu'i ka 'oku te'eki fakamo'oni Huafa mai kiai.
