Tu’uta ‘i Nuku’alofa ni timi tafa mafu ko e Open Heart International ^Featured

‘E ‘i Nuku’alofa ni ‘a e timí ‘i he ‘aho 3 ‘o Sepitema, pea te nau fakahoko fatongia mei ai ki he ‘aho 21 ‘o Sepitemá ‘i he Falemahaki Vaiola pē.

Ko hono fakahā ‘eni ‘e he Toketā Pule ‘o e Falemahaki Vaiolá, Toketā Lisiate ‘Ulufonua ‘i ha fakataha makehe mo e kau faiongoongó ‘i he pongipongi ‘o e ‘ahó ni.

‘I he fakamatala ‘a Toketā ‘Ulufonuá ko e toko 50 fakalukufua ‘a e tokolahi ‘o e timí. ‘O kau ki ai ‘a e kau mataotao ‘i he sivi mafú, kau toketā ‘i he tafa’aki ‘o e tafa mafú, kau nessi mataotao mo e ngaahi tafa’aki kehekehe pē.

Na’a ne fakamamafa’i ‘oku fiema’u ke fakatokanga’i ange ‘e he kakai ‘o e fonuá ko e ngāue ‘oku fakahoko ‘e he timi ko ‘ení ko e ngāue ‘ofa pē. Ko e taimi eni ke nau mālōlō (leave) ai ‘i ‘api mei he’enau ngāué ‘oku nau ha’u ai ke fakahoko ‘a e ngāue ko ‘ení.

Na’e fakahā foki ‘e he mataotao (Specialist) ‘i he Uooti ‘a e Fānau Iikí Toketā Siaosi ‘Aho, ‘e toki fai ha fakatangi ke kole ha ngaahi toto mei he kakai ‘o e fonuá ‘a ia ‘oku kau ‘i he konga ki he teuteu ki hono tali ‘o e timí.

Na’a ne pēhē ko e taha ‘o e ngāue lahi ‘oku nau fakahoko ‘i he taimi ni ko hono fakapapau’i ‘oku maau ‘a e ngaahi lisi mo e ngaahi hingoa ‘e fiema’ú ke nau kau atu ki he faito’ó.

‘I he fakamatala ‘a Toketā ‘Ahó ko Tonga pē mo Fisi ‘i he Pasifikí ‘oku kau he fu’u monū ko ‘eni ko hono ‘ahia ‘e he Open Heart International.

Ka ‘i he fakamatala ‘a e Toketa Ma’olunga ‘i he Uooti ‘a e Kakai Lalahí (Medical Ward) Toketā Loutoa Poese, ‘oku a’u pē ki he toko 60 ‘a e ni’ihi ‘oku nau ma’u ‘a e faingamālie ke nau sivi mafu (screening) ‘ata’ata pē.

‘E ‘i ai pē ‘a e ni’ihi ‘e fai pe hano sivi (screening) pea toki muimui’i aipe ‘a mui pea ‘e ‘i ai leva ‘a e ni’ihi ‘e fiema’u ke fakahoko hano tafa honau mafu.

Taimi tatau pē na’e fakahā ‘e he Metuloni ‘a e Potungāue Mo’uí ‘Akesa Halatanu ‘oku fai ‘a e ngāue lahi ke teuteu’i ‘a e ngaahi feitu’u kotoa pē ‘i he Falemahaki Vaiolá, ke ma’a ki he taimi ‘e tu’uta ai ‘a e timi ‘i Tonga ni. ‘Oku ‘i ai foki mo e toko 30 mei he kau neesi ‘a falemahakí ‘e filifili ke nau tokoni ki he timí ‘i he taimi ‘e fakahoko ai ‘enau ngāué.

Na’e fakamamafa’i foki ‘e Toketa ‘Ulufonua mo Toketa ‘Aho ‘a e ngaahi lelei ‘oku ma’u ‘e he fonuá ‘i he taimi ‘oku ‘a’ahi mai ai ‘a e timi ki Tonga ni. ‘Uluakí ko e ngaahi taukei mo e poto’i ngāue ‘oku lava ke fakavahevahe’aki lolotonga ‘a e ‘i heni ‘a e timí pea uá ko e faingamalie fakapa’angá.

Na’a na pehē ko e fakafolau ‘o ha taha ‘i Tonga ni ki tu’apule’anga ke fakahoko ‘a hono faito’o mafu ko e sēniti lahi ‘e fiema’u ke fakahoko’aki ‘a e ngāue ko ení ka ‘oku ‘omai ‘e he timí ‘a e faingamālie ke fakahaofi ai ha fu’u sēniti lahi.

Na’a nau tapou ai pē ki he kakai ‘o e fonuá ke nau ala nima mai ki hono fakafangamalie’i mo fakafaingofua’i ‘a e ngāué ‘i he taimi ‘e tu’uta ai ‘a e timi ki Tonga ni.

Ko hono tu’o ono ‘aki ‘eni ‘a e ‘a’ahi mai ‘a e timí ki Tongatapu ni, ‘a ia na’a nau kamata ‘a’ahi mai ‘i he ta’u 1987.

- MEIDECC