‘Ave Ha’amoa ‘enau kau mahaki ki ‘Initia kae tuku ‘a Nu’usila: ‘E muimui nai heni ‘a Tonga? ^Featured

‘Oku ‘ikai ha toe ‘uhinga kehe ka ‘oku mahino mai ‘oku ma’ama’a ange ‘eni pea fakahaofi heni ‘a e pa’anga lahi ‘e he fonua.

‘I ha fakamatala ‘a e ongoongo ‘a e Letio Nu’usila ‘oku toe foaki foki ‘e ‘Initia mo e faingamalie ke ‘omai ‘enau kau toketaa ki Ha’amoa kenau fakahoko ai ‘a e ngaahi tafa moe ngaahi faito’o pehe ki hono ako’i ‘a e kau ngaue ki he mo’ui ‘a Ha’amoa.

Na’e fakafolau atu foki ‘i he konga ki mu’a ‘o e mahina ni ha toko ua ki ‘Initia ke fakahoko ha faito’o ki hona ‘ate mo e mafu.

Na’e toe talaki faka ‘ofisiale foki ‘e he Palemia Ha’amoa Tu'ilaepa Sa'ilele Malielegaoi he ngaahi uike kuo maliu atu ‘a e fu’u fakamole ki he fonua hono ‘ave fakafaito’o honau kakai ki muli.

Na’a ne toe me’a foki ‘oku fu’u ma’ama’a ange ‘a e ‘ave fakafaito’o ki ‘Initia kae ‘ikai ko Nu’usila pea ‘oku fakamole ‘e he fonua ‘a e pa’anga ‘Amelika ‘e 10 Miliona he ta’u ‘i hono ‘ave honau kakai ki Nu’usila.

‘Oku mahino foki na’e ‘i ai ‘a e langi mama’o ‘a e Tama Tu’i ‘o e ‘aho ni Tupou VI mo e fokotu’u ki he Pule’anga ke fakakaukau’i ‘a e ngaahi fonua ‘Esia ki he ‘ave fakafaito’o ‘o kau ai ‘a Taileni makatu’unga ‘i he ma’ama’a ‘a e totongi.

Ko e nga’unu ko’eni ‘a Ha’amoa ‘oku matamata ‘e hoko nai ia koha sipinga ke muimui atu ai ‘a e ngaahi fonua ‘o e Pasifiki ‘o kau ai ‘a Tonga ni.

Ko e pa’anga ‘Amelika ‘e 10 Miliona kuo fakamole ‘e Ha’amoa ki he ‘ave fakafaito’o honau kakai ki Nu’usila ‘oku meimei tatau pe ia mo e lahi fakakatoa ‘a e patiseti ‘a e Potungaue Mo’ui ‘a Tonga ki he ta’u.