Tokoni 'a e 'Iunioni 'a 'Iulope ma'a Ha'apai Featured
Riot police have clashed with protesters in Spain, Italy and Portugal
Kuo foaki 'e he Unioni 'a 'Iulope (EU) 'a e pa'anga 'e $2.3 Miliona ke tokoni ki hono toe fakamalohi'i 'a hono fakahoko 'a e ngaahi ma'u'anga 'uhila 'a Ha'apai 'a ia na'e uesia 'e he saikolone ko Ian. Na'e fakamo'oni 'a e aleapau ki he tokoni ko'eni 'e he 'Amipasitoa 'a e 'Iunioni 'a 'Iulope ki he Pasifiki Mr. Andrew Jacobs pehe ki he 'Eiki Palemia 'o Tonga Samiuela 'Akilis Pohiva. Na'e pehe 'e Jacobs 'e fe'unga moe 'api 'e 1000 pehe ki he ngaahui 'ofisi faka Pule'anga 'e 30 'e ma'u faingamalie mei he tokoni ko'eni. Na'a ne toe pehe foki na'e peseti 'e 90 'a e ma'u'anga 'uhila 'a Ha'apai na'e maumau 'i he fakatamaki ko'eni.
Ko e ma'u'anga ivi 'oku toutou fakafo'ou (renewable energy) mo hono ngaue lelei'aki 'oku fu'u mahu'inga lahi ia ki Tonga koha fonua 'oku tu'u lavea ngofua ma'u pe ki he fakatamaki fakanatula pea 'oku lau miliona foki 'a e pa'anga 'oku fakamole 'e he fonua ki hono hu mai 'a e lolo mei Tu'apule'anga. Ko hono siofi 'a e ngaahi ma'u'anga ivi 'oku ma'a mo falala'anga 'e tokoni lahi ia ki he fonua 'o hange ko Tonga 'oku uesia ma'u pe 'e he fakatamaki fakanatula pea 'e malava ke tauhi ke hokohoko lelei koe fakamatala ia 'a Jacobs.
Na'e me'a 'a e 'Eiki Palemia 'o pehe 'oku hounga'ia 'a e fonua he tokoni ko'eni pea ko e toki kamata foki 'eni 'a e Pule'anga ko'eni ka 'oku nau lolotonga lele pe he patiseti lolotonga ne teuteu 'e he Pule'anga motu'a. Na'a ne toe me'a foki 'o pehe koe pule lelei 'a e hala ki he fakalakalaka pea 'oku nau muimui ofi ki hono ngaahi 'elemeniti. Na'a ne hoko atu 'o pehe 'oku mahu'inga foki 'a e pule lelei ki hono tauhi e va fengaue'aki mo e ngaahi fonua mo e ngaahi kautaha tokoni fakavaha'a Pule'anga.
Na'e me'a foki 'a e 'Eiki Minista Pa'anga Hon. Dr. 'Aisake Eke 'i hono fakamo'oni'i 'a e tokoni ko'eni ne faka hono 'i 'ofisi 'o e Potungaue Pa'anga.
Source: Matangitonga
