Huufi 'e he Tama Tu'i Senita Fakataki Va'a Tautahi Kau Tau 'Ene 'Afio
2 Sune 2024. Na'e Huufi 'e he Tama Tu'i Tupou VI 'a e Senita Fakataki (Leadership Center) 'a e Va'a Tautahi Kau Tau 'Ene 'Afio 'i he Peisi Mafefield 'i Touliki 'i he pongipongi 'o e 'aho ni.
Na'e me'a foki 'i he katoanga ni mo e Ta'ahine Kuini Nanasipau'u Tuku'aho pehe ki he 'Eiki Minisita Malu'i 'a Nu'usila Hon. Judith Collins fakataha mo e Tama Pilinisi Kalauni Tupou To'a 'Ulukalala, 'Eiki Palemia Hon. Hu'akavameiliku pehe ki he kau fakaafe tokolahi.
'Oku fe'unga 'a e mahu'inga 'o e Senita ko'eni mo e pa'anga 'e $6.5 miliona pea na'e fakapa'anga 'eni 'e he Potungaue Malu'i mo e Potungaue Ki Muli 'a Nu'usila 'i he konga 'o e fengaue'aki malu'i mo e Kau Tau 'Ene 'Afio.
Ko e Senita Fakataki ko'eni 'i he me'a 'a e Kenolo Pule (Colonel-in-Chief) 'a e Kau Tau 'Ene 'Afio Pilinisi Kalauni Tupouto’a ‘Ulukalala 'e tokoni lahi 'o 'ikai ngata ki he fatongia tefito 'o e Kau Tau 'Ene 'Afio ka 'e tokoni lahi ki he kakai 'o e fonua mo e fonua tautautefito ki he hoko 'a e ngaahi fakatamaki fakaenatula.
