Fokotu’u ‘a e ‘Ofisi Faka-'Amipasitoa ‘o ‘Amelika ‘i Tonga ni mo e Senitā Tailasisi

Ko e fakahā eni ‘e Hon. Hu’akavameiliku ‘i ha konifelenisi mo e kau faiongoongo na’e fakahoko he houa efiafi ‘o e Pulelulu 20 ‘Okatopa, 2022.

Na’e hili ‘a e fakataha mo e mo e kau ‘ofisiale mei he Pule’anga ‘Amelika he mahina kuo ‘osi, na’e fakapapau’i ai ko e ngaue mahu’inga taha ‘oku fai ki ai ‘a e tokanga ke fokotu’u ‘a e ‘Ofisi Faka’amipasitoa ‘o ‘Amelika ‘i Tonga ni pea fai ai mo e alea ki ha faingamalie ke ‘omai mo e konisela ke fakafaingamalie’i ‘a e kole visa ‘a e kakai ‘o Tonga ni.

“Na’e ‘i heni e timi savea he mahina kuo ‘osi ke vakai’i ia pea ‘e fai e fengaue’aki ka ‘e fakafalala he ola ‘enau savea ‘a e taimi ke fokotu’u ai ‘a e ‘ofisi,” ko e me’a ia ‘a Hon Hu’akavameiliku.

Na’a ne me’a na’e hili e fakataha mo e kautaha ke nau fakapa’anga ‘a e Senitā Tailasisi ‘i Salt Lake City, pea kuo ‘i ai ‘a e palani ke kamata ‘i Me, 2023.

“‘E fakahoko ‘a e tanupou ‘o e langa ki he faka’osinga ‘o e ta’u ni ‘i Veitongo pea ‘oku ‘i ai ‘a e hounga’ia ke lava e senitaa ni ‘o ngaue kia kinautolu ‘i Tonga ni ‘oku fu’u fiema’u. Pea ke ako’i ai ‘a hotau kainga Tonga ke nauma’u e me’atokoni mo’uilelei he ‘oku mahu’inga ia ki hono tau’i ‘o e mahaki suka,” ko ‘ene
me’a ia.

Na’a ne fakamalo’ia’i ‘a e Komiuniti Tonga ‘i ‘Amelika na’a nau talitali lelei ia mo ‘ene kau muimuifolau.

“ Na’a mau fie fe’iloaki pe mo e kainga Tonga ‘i ‘Amelika ke fakahoko kia kinautolu ‘emau hounga’ia ‘i he tokoni kotoa kuo fakahoko mai ki Tonga ni tautefito ki he taimi na’e ‘osi ai ‘a e mapuna ‘a e mo’ungaafi mo hake ‘a e peaukula. Na’e ma’u ai e faingamalie ke fakahoko kia kinautolu’a e ngaahi fakalakalaka kuo a’usia ‘e Tonga mo siofi ha ngaahi ngaue pe kaveinga ‘oku nau fiema’u ai ‘emau tokoni,” ko e me’a ia ‘a Hon Hu’akavameiliku.

Ngaahi Fakataha ‘i he White House

Na’e me’a ‘a e ‘Eiki Palēmia ki he fakataha lelei ne lava fakahoko mo e Palesiteni ‘o ‘Amelika ‘a ia na’e fakatefito ‘i he teu fokotu’u ‘o e ‘Ofisi Faka-‘Amipasitoa, ngaahi pole ki he Feliuliuaki ‘o e ‘ea ke tukuhifo’aki ha peseti ‘e 1.5 ‘a hono tukuatu ‘o e kaponi (Carbon), pehe ki ha ngaahi faingamalie ako ma’a e kakai Tonga ki ‘Amelika, ngaahi fokotu’utu’u ke malu’i ‘a e potutathi ‘o Tonga mo e Pasifiki pehe ki ha founga ke holoki e hikihiki e totongi koloa ‘oku ne uesia ‘a e taha kotoa he lolotonga ni.

Na’e feme’a’aki ‘a Hon Hu’akavameiliku mo Palesiteni Biden pehe ki he toenga e kau taki ‘o e Pasifiki ‘i he White House.

Sipoti ‘a e Pasifiki

Kuo malava ‘a e alea he vaha’a ‘o e ‘Ofisi ‘o e ‘Ateni Seniale mo e Kosilio ‘a e Sipoti Pasifiki, ‘o hange pe koia na’e ha ‘i he Ongoongo Tukuatu ne tukuatu kimu’a.

Ko e aleapau ko eni ‘oku fakapulipuli.

‘Oku faka’amu ‘a e Pule’anga ke kei ‘i ai pe ha faingamalie ‘o Tonga ke fakahoko mai ki ai ha fe’auhi Sipoti Pasifiki he kaha’u.

Langa fale

Na’e me’a ‘a e ‘Eiki Palēmia, ‘oku hokohoko atu pe ‘a e ngaue ki he langafo’ou ‘o e ngaahi fale nofo’anga ‘o kinautolu na’e uesia he mapuna ‘a e mo’ungaafi Hunga-Tonga Hunga-Ha’apai mo e hake ‘a e peaukula, pea mo e ngaahi fale nofo’anga ‘e 40 kuo lava.

‘Oku fakaangaanga ke kamata ‘a e langa ki Ha’apai ha maau malie ‘a e naunau langa ke uta ki motu he uike ka hoko mai, pea mo e palani ke ‘osi pe kimu’a he faka’osinga ‘o e ta’u ni.

Na’e fakamalo’ia’i ‘e Hon Hu’akavameiliku ‘a e Potungaue Fonua mo e Koloa Fakaenatula pehe ki he Potungaue ki he Ngaahi Ngaue Lalahi ki he ngaahi ngaue kuo fakahoko.

Minisitā Pa’anga

Ko e Minisitā Pa’anga fo’ou ko Hon Tiofilusi Tiueti ‘a ia na’e kamata lau mei he ‘aho Monite 17 ‘o ‘Okatopa, 2022.

Na’e fakaha ‘e Hon Hu’akavameiliku ‘e toki me’a mai ‘a e ‘Eiki Minisitā Pa’anga he ‘aho Monite 24 ‘o ‘Okatopa hili ha’ane kau atu ki he fakataha fakata’u ‘a e Pangikē ‘a Mamani(WB) mo e fakataha ‘a e IMF.

Sipoti

Na’e ‘oatu mo e popoaki talomonu ‘a e ‘Eiki Palēmia ‘o fakafofonga’i ‘a e Pule’anga ki he timi netipolo ‘a e Tala mo e timi liiki Mate Ma’a Tonga ‘oku na lolotonga kau atu ki he ongo fe’auhi fakavaha’apule’anga he lolotonga ni ‘i ‘Aositelēlia mo Pilitania.