Fakataha ‘Eiki Palēmia mo e Tokoni Sekelitali ki Muli ‘a ‘Amelika pehe ki he kau taki Pasifiki
15 Sepitema 2022. Na’e fakataha ‘a e ‘Eiki Palēmia mo e Tokoni Sekelitali ki Muli ‘a ‘Amelika, H.E. Wendy Sherman, ‘i he ‘aho hono ua ‘o e Fakataha hono 12 ‘a e kau Taki ‘o e Pasifiki (PICL) ‘oku lolotonga fakahoko he East-West Centre.
Ko e fakataha ni ke alea’i e ngahi ‘elia ‘oku vivili ki ai e fiema’u ma’a Tonga.
Na’e kau ai ‘a e: alea’i ke fokotu’u ha sino fakafeitu’u he Pasifiki ke nau ngaue ki hono tokanga’i ‘a hono tufaki e pa’anga tokoni ki he Green Climate; fengaue’aki ki ha polokalama fe’unga kia kinautolu ‘oku fakafoki mei he fonua muli ki Tonga; founga ke fakalelei’i ai ‘a e kole visa ‘i he ‘Ofisi Faka’amipasitoa ‘i Fisi mo ha founga ke fakafepaki’i’aki ‘a e toutai ta’efakalao mo e toutai’i tavale ‘o e konga tahi faka’ikonomika ‘o Tonga.
Na’e fakamamafa’i ‘e he ‘Eiki Palēmia ‘a e mahu’inga ke tukuange mo ha faingamalie ‘o e fanauako Tonga ke nau lava ‘o ako he ngaahi ako ‘Univesiti ‘i ‘Amelika ‘oku leleiange ‘enau sisitemi fakaako.
Lolotonga eni, na’e kamata ‘a e ‘aho hono ua ‘a e fakataha PICL ‘aki ‘a hono talanoa’i ‘o e ngaahi ngaue ‘a ‘Amelika ‘i he Pasifiki.
Ko e fakataha ni na’e tataki ‘e Dr. Satu Limaye, ko e tokoni Palesiteni ‘o e East-West Center, pea lea ai ‘a H.E. Wendy Sherman, ko e Tokoni Sekelitali ki Muli ‘a ‘Amelika; Mrs. Carmen Cantor, Tokoni Sekelitali ki he Ngaahi Ngaue Fakalotofonua; Lafitani Seniale Stephen Sklenka ‘o e US INDOPACOM; pea mo ‘Amelali Michael Day mei he Va’a Malu’i e kau’afonua ‘a ‘Amelika.
