Liliu e ngaahi fakataputapui ki he fonua ^Featured

Ko e me’a eni ‘a e ‘Eiki Palēmia, Hon. Hu’akavameiliku lolotonga ‘a e fakataha mo e kau faiongoongo na’e fakafou he tekinolosia he ‘aho ni mei Nuku’alofa.

“Koe’uhí ko e fale’i kuo mau ma’u mei he Potungāue Mo’ui, kuo loto ai ‘a e Kapineti ke tau hoko atu ki he tu’unga hoko ‘o e fakataputapui ‘i he uike ‘e ua ka hoko, ‘o kau ki ai mo Ha’apai,” ko e me’a ia ‘a Hon Hu’akavameiliku.

Tongatapu mo Vava’u

‘E kamata he 5:01 hengihengi ‘o e ’aho Tokonaki 9 ‘o ‘Epeleli, ‘e faka’atā ke ngaue atu ‘a e ngaahi pisinisi fale koloa kotoa ‘i Tongatapu mo Vava’u.

‘Oku kau ki heni ‘a e ngaahi Kautaha tālafi pa’anga, maketi, ‘utu’anga kasa mo e pausa.

‘E kei tapuni pe ‘a e Maketi Talamahu kae kei fai e palani mo e fokotu’utu’u ‘a e pule ki ha founga ke nau ngaue’aki.

‘E ‘atā e lotu ke fakahoko ‘i Tongatapu mo Vava’u ‘i he faka’osinga e uike kaha’u pe uike pekia, mo e kole mei he Pule’anga ke tauhi pe ngaahi tu’utu’uni mei he Potungaue Mo’ui.

‘A ia ko e Falaite Lelei, ‘aho 15 ‘o ‘Epeleli mo e Sapate 17 ‘o ‘Epeleli.

Ko ha toe ‘aho kehe mei he ongo ‘aho ko ia he lolotonga ‘o e uike pekia ke tohi kole ia ki he ma’umafai ke ‘oatu ha faka’atā.

Ka ‘oku ‘i he siasi takitaha pē pe ‘e fakahoko ha’anau lotu pe ‘ikai.

‘E kei tapuni pe ‘a e ako ‘i he uike ‘e ua ka hoko pea ‘e hokohoko atu pe ‘a e Polokalama Ako mei ‘api he letio mo e tekinolosia ‘initaneti.

‘E faka’atā mo e sipoti tenisi, tā pulu mo e pickle ball, pea ngofua mo e lue fakamalohisino ka e kei muimui pe ki he tu’utu’uni ‘a e Potungāue Mo’ui.

Na’e me’a ‘a Hon. Hu’akavameiliku, kuo tali ‘e he Kapineti ke faka’atā mo e koka’anga ‘a e kakai fefine kae fakahoko fakapotopoto pe ki he tokolahi ko e toko 10. Na’e kole ‘a e Tokoni Palēmia, Hon Poasi Tei, ke faka’atāange ‘a e kau toulekeleka ‘oua tenau kau ki he koka’anga koe’uhí ko ‘enau tu’u laveangofua.

‘E ‘a’ahi atu ‘a e kau ‘ofisa mei he Potungāue Mo’ui mo e Polisi ke vakai’i e ngaahi koka’anga ‘e fakahoko. 

Ko e fakataputapui ‘o e fefononga’aki ‘e kamata he 8po’uli ki he 5hengihegi.

Ha’apai

‘E ‘atā ‘a e ngaahi sevesi ‘e faka’atā ‘e he lao ki he lanu kulokula ki he kakai ‘o Ha’apai he ‘aho Tokonaki ko eni, Tusite mo e Tu’apulelulu kaha’u, ‘o tatau ki he uike ka hoko mai.

‘Oku kei hokohoko atu ‘a e ngaue ‘a e timi mei he Potungaue Mo’ui ‘i Ha’apai ki hono fakahoko e ngaahi ngaue fakatotolo tokamu’a ki he vailasi mo e muimui’i ha ni’ihi na’e feohi vaofi mo ha ni’ihi kuo puke.

Fakamuimuitaha mei he Potungaue Mo’ui

Na’e me’a ‘a Hon. Hu’akavameiliku ‘o fakahā ‘a e fiefia ‘a e Pule’anga he mahino ‘oku ‘i ai e holo ‘i he tokolahi ‘o kinautolu ‘oku nau puke fo’ou ki he ‘avalisi ko e 100 tupu pe he ‘aho.

Na’a ne fakamalo’ia’i ‘a e kakai ‘o e fonua na’a nau muimui mo faipau ki he kole ne tukuatu mei he Pule’anga ke tau muimui ki he ngaahi fale’i mei he Potungaue Mo’ui, pehe ki he ngaue kuo fakahoko ‘e he kau lainemu’a mo e kau ngāue ‘a e Potungāue Mo’ui.

Ko e ‘aho ni ko e kau puke fo’ou ‘e 143 na’e lekooti he houa ‘e 24 kuohili, toko 1,969 ‘oku lolotonga mo’ua he vailasi koviti-19 pea toko 5,541 kuo nau sai talu mei he ‘aho 1 ‘o Fepueli 2022. Ko e huhumalu’i ko e peseti ‘e 98 ki he ‘uluaki huhu malu’i, peseti ‘e 90 ki he huhu hoani pea peseti ‘e 50 ‘a e huhu fakalahi.

Tokoni langa fale

Na’e me’a ‘a Hon Hu’akavameiliku ‘o fakahā ‘a e fiefia ‘a e Pule’anga he hā sino mai e ngaue ki he Polokalama Langa Fale Tokoni Hunga-Tonga-Hunga-Ha’apai mo e peaukula, ‘i hono fakaava ‘aneafi ‘a e fuofua fale kuo lava hono langa he polokalama tokoni ko eni ‘i ‘Ahau.

‘Oku palani ‘a e Pule’anga ke hokohoko e polokalama langa fale tokoni ki he tukuimotu na’e uesia he ‘Otu Ha’apai.

Ko kinautolu na’e maumau pe mole honau ngaahi fale nofo’anga he fakatamaki ‘o Sanuali 15, ka ‘oku ‘ikai ke nau kau he tokoni ko eni, ‘oku kole atu ke fakahū mai ha’anau tohi kole ki he tokoni ki he Potungaue ki he Ngaahi Ngaue Lalahi.

Sino’i Pa’anga Malolo Fakafonua

‘Oku ngaue ‘a e ‘Ateni Seniale ki he Lao ‘a e Poate Sino’i Panga Malolo Fakafonua, hili ‘a e loto lelei ‘a e Poate ke fai hano vakai’i ‘o e lao na’e fokotu’u ‘aki ke lava ha tokoni ‘i he ngaahi taimi faingata’a ni kihono kau memipai.

‘E fakahū atu, neongo ‘e tuai pea ko e founga pe eni kuopau ke muimui ki ai, ki he Falealea ke nau alea’i.