Fakafo'ou 'e he Pule'anga 'a hono Fakahā ‘o ha Tu’unga Fakafokifā Featured
23 Noveme, 2020. Kuo toe fakafo'ou 'e he Pule'anga 'a hono Fakahā ‘o ha Tu’unga Fakafokifā 'o makatu'unga pe 'i hono kei lehilehi'i e fonua mei he ta'au 'o e panatemika fakalilifu koe covid-19.
Kuo fakahoko ai 'e Pule'anga 'o fakafou mai 'i he 'Eiki Palemia 'a e tu'utu'uni koeni:
Fakatatau ki he kupu 32 mo e 34(1) ‘o e Lao ki he Pule’i ‘o e Me’a Fakafokifā 2007, pea ‘i he’eku fakapapau’i ‘a e ngaahi me’a ko ‘eni –
(1) ‘Oku kei mafola ‘a e mahaki novel coronavirus (“COVID-19) fakamamani lahi pea ‘i he ngaahi fonua ofi ki Tonga;
(2) ‘O fakatatau ki he Ngaahi Tu’utu’uni Fakahā ‘o ha Tu’unga Fakatu’utamaki ki he Mo’ui (COVID-19) 2020 na’e fakahoko ‘i he ‘aho 11 ‘o Sepitema 2020 pea kasete’i ‘i he ‘aho 11 ‘o Sepitema 2020 tukukehe ka toe fakalōloa ‘i he kupu 167 ‘o e Lao ki he Mo’ui ‘a e Kakai 2008 pea mo e Fakahā ko ia ‘o e COVID-19 ko e Mahaki Fanongonongo Fakatu’utamaki ‘i he ‘aho 11 ‘o Sepitema 2020 pea kasete’i ‘i he ‘aho 11 ‘o Sepitema 2020, kuo mahino mei ai ‘oku kei hokohoko mai pe ‘a e fakatu’utamaki ki he mo’ui ‘a e kakai ‘i Tonga;
PEA ‘oku ou fiemalie ai ke kei ngaue’aki ‘a e mafai ‘i he me’a fakafokifa koe’uhi ke ta’ofi pe fakasi’isi’i ‘a e malava ke hoko mo e mole ko ia ‘a e mo’ui koe’uhi ko e COVID-19, ‘i he’ene pehe ‘oku ou fakafo’ou ai ‘a e Fakahā ‘o ha Tu’unga Fakafokifā ‘a ia na’e fakahoko ‘i he ‘aho 26 ‘o ‘Okatopa 2020, ke ngaue’aki ki he kotoa ‘o e ngaahi ‘elia ‘o e fonua mo e potu tahi ‘o Tonga ‘o kamata mei he ‘aho Monite 23 ‘o Novema 2020 ‘i he taimi 8:00 efiafi, ki he ‘aho Monite 21 ‘o Tisema 2020 ‘i he taimi 8:00 efiafi, tukukehe ‘o ka toe fakafo’ou ‘o fakatatau ki he lao.
