Manumanumelie ʻa e Faiva e Manuēsiná ʻi he Matāfanga ʻo Waiheké ^Featured

ʻOkú hēhēʻia mo ʻāʻāvea ʻa e tokolahi ʻi he tatau, potupotutatau, hōhoatatau, mo fakaʻofoʻofa ʻa e faiva e Manuēsiná ʻi he matāfanga ʻo Waiheké. Ko e Manuēsiná ko e tufunga tongipolimea (polymer sculpture) ʻa e tangata tufunga ko Sēmisi Fetokai Potauaine mei Vavaʻu ka ʻoku nofo ʻi Aotearoa.

ʻOku mālie ʻa e vaka mai ʻa e Manuēsiná ʻi he polimeá; he ko e naunau ʻoku fenāpasi mo e fonua pe ʻātakaí. Naʻe akeloto kia Sēmisi ʻa e fakakaukau ki he Manuēsiná mei he ʻetau kupesi ʻiloa ko e Manuluá, ʻa ia ko e fakatātā kupesi ʻo e ongo foʻi manupuna ʻe ua ʻokú na puna ʻo fetautaulaki ʻi he vavaá.

ʻOku matamata ko e Manuluá ko e ʻata ʻo e ongo foʻi manupuna ko e lofa (pe ko e helekosi) ʻe ua ‘oku na puna fakataha, ʻa ia ko e manupuna mahuʻinga ki he talamatangi mo e kumifonua ʻa e kau kaivaí moe kau toutai.

ʻOku ʻuhinga ʻa e hingoa Manuēsiná ki he manupuna lanu hinehina (pe manupuna lanu tetea pea toe lava pe ‘o ui koe Manuēhina pe Manuētea). ʻOku fotu mai mei he Manuēsiná ʻa e puna tūʻulu hifo ʻa e ongo foʻi manuvākai mei he langí ‘I ‘olunga kae mapuna hake ʻa e manusiu mei tahi ‘I lalo ʻonau fetaulaki tuʻu ʻi he vavaá ʻo felavalavaí.

ʻOku hopo mo fisi mai ʻa e ngaahi foʻi kupesi tupuʻa fakaʻofoʻofa mei he tapa mo e ʻeu kotoa ʻo e Manuēsiná he‘ene ngaungaue tu‘uma‘u mo ta‘engatá mei loto-ki-tu‘a mo tu‘a-ki-loto, ʻo hangē ko e Humu, Toloa, Kefukefu, Vakatou, Manulua, mo e ngaahi kupesi kehekehe.

ʻOku hoʻata mai ko e fōtunga ʻo e ika ko e humu mo e manupuna ko e toloa naʻe matuʻaki mahuʻinga ʻaupito ki he ʻetau fanga kuí he ʻoku fakafuo mai ʻi he Tokelau Feletoá, Kalou, Kauikalilo, Manulua, mo e Fata-ʻo-Tuʻi-Tongá. Ko e Humú mo e Toloá ʻoku tā kupesi ʻi he fuo ʻo e taiamoni pe lomipasi (rhombus).

ʻOku ʻi ai foki ʻa e ʻotu kaveinga ʻoku ʻiloa ko e Humú mo e Toloá naʻe fakataumuʻa ki ai e folau ʻa e kau kaivai mo e kau toutai ʻo onoʻahó. Ko e talu foki hono ʻave ki langi ʻehe ongo māhanga fītaʻa ko Maʻafulele mo Maʻafutoka.

ʻOku matamatalelei ʻaupito ʻa e mata mo e ava ʻo e Manuēsiná. He ʻoku mālie lahi mo ngali moʻoni foki ʻa e vavanga mo e vavalo ʻa Hūfanga Palōfesa ʻŌkusitino Māhina mo Sēmisi Fetokai Potauainé ʻi he Teolia/Filōsofia Tā-Vā ʻo e ʻIaí ko e matá/avá ko e tefito ia ʻo e kupesi kotoa pē (mo e uhouhonga ‘o e ivi).

He ko e matá/avá ko e felavai ʻa e ongo foʻi kohi ‘e ua pe lahi ange, pea ko e kohí ko e tātānaki fakaʻotu taha ʻo e matá/avá. Ko e kohí ko e tā ia pea ko hono tātānaki fakahokohoko ʻo e kohí ʻoku maʻu ai ʻa e vaá. Ko e taá mo e vaá ʻokú na felavai maʻu pē. Ko ia ai, ʻoku fakaʻofoʻofa fau hono takohikohi ʻe Sēmisi ʻa e sino/uho/vā ʻo e Manuēsiná.

Ko e fotu mai ʻa e Manuēsiná ʻokú ne fakalika mai ʻa e ʻuhinga ʻo e foʻi lea Tonga mālie mo mohu ko e "manumanumelie", ʻa ia ʻoku matamata ʻoku ʻuhinga ki ha manupuna ʻoku tatau mo potupotutatau hono fulufulú mo ‘ene kapapuna mo e kapatā he ʻene faikapakau ‘o faiva siú he moana vavale pea fisi-mei-loto-ki-tuʻa mai ʻa e fakaʻofoʻofa, mālie pe melie.

Mālō mo tangane e tufunga ‘ene tatau mo potupotutatau atu pea to e faka‘ofo‘ofa, mālie mo melie fau Sēmisi Fetokai Potauaine. Kuo manumanumelie ʻa e faiva e Manuēsina ʻi he matāfanga ʻo Waiheké.