Ko e Uike Lotu ‘o Tonga ^Featured

Ko e ta‘anga hiva uike lotu

Tau / Kōlesi[1]

 Faka‘ofa si‘i uike lotu ‘o Tonga

‘Alu pea ke ha‘u

Ko hai na‘a ne ‘iloa

He koe nofo tutuku ‘eni

Fakava‘e / Futinouti

[1] ‘Oku ‘ofa‘ia ‘ae punake he Uike Lotu ‘o Tonga he‘ene ‘alu moe ta‘u motu‘a kae pango ‘oku ‘ikai ‘iloa pē te tau lau mo kau he‘ene toe ha‘u moe ta‘u fo‘ou he koe nofo nunu mo vete, fa‘u mo tutuku, mo ha‘i mo veteki, ‘etau fononga ta‘etuku mei he kauvai ‘o taimi kihe kauvai ‘o ‘itāniti (tau / kōlesi kohi / laini 1-4).

Koe ki‘i kinikini, huluhulu, moe fakamatala nounou

‘Oku ngāue‘aki ‘ae (1) Uike Teu Folau / Fakahekeheka Folau ki Vaha; (2) Uike Teu Fononga / Fokotu‘utu‘u Fononga ki Toafa; (3) Uike Tō Ta‘u koe ‘Oho kihe Folau Loa he Vaha Noa moe Fononga Loa he Toafa Loa, moe (4) Uike Ha‘amo ‘o Tonga hono Mamafa moe Faingata‘a koe heliaki, fakatātā, moe taipe mohu mo fonu kihe (5) Uike Lotu ‘o Tonga.

‘Oku ngāue‘aki ‘ae ‘noa’ kihe lahi vavale ‘oe vaha ‘oku toe ‘iloa koe moana loloto, moana vavale, moana ‘uli‘uli, moana ta‘etakele, moana ta‘e‘iloa, ‘o ‘uhinga koe potu ‘oe faingata‘a moe mate. ‘Oku fakatatau ‘ae vaha ‘noa’ kihe toafa ‘loa’ koe fai vavale ‘aha konga fonua ‘oku pakukā, lala, toutounoa, mo lāfua‘a hono anga, ‘o toe ‘uhinga pē koe potu ‘oe faingata‘a moe mate.

‘Oku ‘uhinga ‘ae ‘tō ta‘u’ kihe tokonaki moe tokateu ‘oe ‘oho folau moe ‘oho fononga, ‘o tefito he mohu moe fonu ‘mā’ moe ‘vai’ koe ma‘unga ‘oe mo‘ui mei he faingata‘a moe mate, pea moe ‘ha‘amo’ kihe kavenga mamafa moe faingata‘a ‘oe folau loa ‘i vaha noa moe fononga loa ‘i toafa loa kae toe pehē kihe tō ta‘u hono tokonaki mo tokateu ‘ae ‘oho folau ki vaha noa moe ‘oho fononga ki toafa loa koe melenga ‘oe mo‘ui mei he mate.

‘Oku tefito he ‘mā’ moe ‘vai’ koe heliaki / fakatātā ‘ae mo‘ui mei he mate koe taipe kihe ‘sino’ moe ‘toto’ / ‘ta‘ata‘a’ tapu ‘o Sisū koe Misaia / Fakamo‘ui na‘a Ne mate noa kae mo‘ui noa ‘a Mamani mei he mate moe mala‘ia ta‘engata. ‘Oku mā‘uhinga mo ‘aonga pē ‘ae ‘mā’ moe ‘vai’ kihe ‘sino’ moe ‘toto’ koe ‘vaka’ ‘oe feilaulau faimatekina ‘a Kalaisi ‘oku humaki he tau‘atāina fakalaumālie moe fakamolemole.

Tau toki hoko atu.

‘Ofa loto moe manatu ongo,

Fetongikava Dr Viliami Uasikē Lātū &

Hūfanga-He-Ako-Moe-Lotu Palōfesa Dr ‘Ōkusitino Māhina