Letiō ^Featured

Ko e fakafatu / fakafa‘u moe fakaafo / fakafasi ‘e Siope Puli

Ko e fai / hiva ‘e he Fola‘osi mei Kanokupolu, Tonga‘eiki / Tongatapu / Tongalahi

1. Kuo u tumu au he letiō na‘e ha‘u mei ai ‘ae ongoongo
   Na‘e tala ‘ehe tēvolo kuo ofi ‘ae vaka Tokiō
   Kuo pomu ‘a Pangopango pea taufetuku kihe vao
   Malu‘i ‘ae loto kolo veteki moe ngaahi ako

   2. Koe tu‘utu‘uni matu‘aki fu‘u lelei
   Malu‘i ‘ae mo‘ui koe me‘a fai ‘e mamani
   Fetuku ‘ae vaivai moe fanga ki‘i tamaiki
   Na‘a ha‘u ‘ae fili pea fakatu‘utāmaki

   3. ‘Ae Tonga keke tokanga koia ‘ae moto ‘oe fonua
   ‘Oua ‘e falala ki natula
   Me‘afana fonua pē kau tau malu‘i fonua
   Manuao pē vakapuna pē sapamalini moe heletā

   4. Ke tau nofo mo lotu koia ‘ae me‘a ‘oku totonu
   Tokanga‘i hota kaha‘u na‘a hoko koe koto palakū
   He kuo hulu fau ‘ae loi pea moe lasu
   Ka ‘oku mau tuku atu kihe ‘otua ‘ae totonu

   Tau

   ‘Ae Tonga tu‘u ‘o laka pea to‘o ho‘o pā
   Ko hota fatongia kuo ‘osi tuku ki ‘olunga
   Hota fatongia koe lotu moe tautapa
   Koia pē ‘ae tokoni kihe faingata‘a

Koe ki‘i kinikini, huluhulu, moe fakamatala nounou

‘Oku taku na‘e fakafatu / fakafa‘u mo fakaafo / fakafasi ‘ae ta‘anga hiva fakahisitōlia / fakatalaēfonua mālie ni fekau‘aki moe Tau Lahi Hono II ‘a Mamani he 1940 tupu si‘i ta‘ū ‘a Siamane mo Pilitānia (Falanisē, Lūsia mo fē fua) ‘i ‘Iulope mo Siapani mo ‘Amelika ‘i Moana / ‘Ōsenia / Pasifika koe “Letiō” ‘ehe punake kakato ko Siope Puli pea fai / hiva ‘ehe kau hiva le‘o ‘iloa koe Fola‘osi mei Kanokupolu.

‘Oku kamata ‘ae ta‘anga he faka‘ise‘isa ‘ae punake he pā mai hono fakamafola he letiō ‘ae ongoongo ‘ene fakamamahi he kamata ‘ae tau (kupu / veesi 1), ‘o kau ai ‘ae ngaahi fatongia ke fai koe malu‘i ‘ae mo‘ui, ‘aia ‘oku kau ai ‘ae lotu mo fakasi‘isi‘i ‘ae loi moe lasu (kupu / veesi 2-4).

‘Oku ngata ‘ae ta‘anga he pole kihe Tonga mo Tonga kotoa ke hake ‘ae lotu mo‘oni moe tautapa kihe ‘otua kae hifo ‘ae tapuaki ‘o fungani koe ‘alo‘ofa.

 ‘Oku hanga ‘ehe punake ‘o ngāue‘aki lelei he faiva ta‘anga (poetry) moe faiva hiva (music) ‘ae toe ongo faiva koe faiva fakamamahi (tragedy) moe faiva fakaoli (comedy), ‘o tukukehe ange ‘ae fa‘ahinga ‘e tolu ‘oe heliaki koe “lea kihe me‘a ‘e taha kae ‘uhinga kihe me‘a ‘e taha,” ‘aia koe heliaki fakafetongiaki (qualitative epiphoric heliaki), heliaki fakafekauaki (associative metaphoric heliaki), moe heliaki fakafefonuaki (constitutive metonymic heliaki).

‘Oku toe mohu mo fonu ange ‘ae heliaki he‘ene toe ngāue‘aki lelei ‘ae ngaahi lea muli, ‘o hangē koe letio (radio), tēvolo (devil), Tokiō (Tokyo, Japan), pomu (bomb), sapamalini (submarine), moto (motto), moe natula (nature). ‘Oku feliliuaki ‘ae afo / fasi, ‘o tatau ‘ae kupu / veesi 1-4 kae kehe ‘ae tau, ‘o ‘ikai ngata he‘ene tatau, potupotutatau, moe mālie hono anga kae toe māfana, vela, mo tauēlangi hono ola.

 Tau toki hoko atu ...

 ‘Ofa fau moe ‘ānau ma‘u,

Fetongikava Dr Viliami Uasikē Lātū & Hūfanga-He-Ako-Moe-Lotu Palōfesa Dr ‘Ōkusitino Māhina