Hiva ‘o Makahokovalu (Song of Makahokovalu) ^Featured

 Ko e ta‘anga hiva fakamamahi (moe tututlu)(Song of tragedy [and of mourning])

 Ko e maa‘imoa (fakafatu, fakafa‘u, mo e fakaafo, fakafasi) ‘a Kuini Salote(Poetry and music composed by Queen Salote)

 Kupu, veesi 1

 Tokelau na‘e angi pea hako

‘O falala he Houmaniutao

Lu‘ia hono mapo‘i hingano

Na‘e moto ‘i ‘Ouana‘angalo

 Kupu, veesi 2

 ‘Ahea moe Fa‘ihetuva

Vakaia si‘i fetu‘u koula

Kuo fakapuli ‘ihe Futukovuna

Na‘e ngana moe malu‘ifonua

 Kupu, veesi 3

 He siu na kuo alaimoana

Tounoa si‘i Lalaheilala

‘Aloitalau koe matanga

Kuo fai ai ‘ape ha lata

 Kupu, veesi 4

 Sei o fafine ‘eva he maheni

Hoto pale motomoto‘ilei

Koe loa na‘e tu‘u hengihengi

Koe kapakau ‘oe leveni[1]

 Kupu, veesi 5

 ‘E Fangasiale koe tau e

Kuo lapa ‘ae Hikutamole

‘Ihe Fahina ‘oe Paepae

Ko si‘i mausa ‘oe Fangatave

 Tau, kolesi

 He ko Lelea tala ‘ae vai

Hao‘uli ai ‘ae toutai

Te ‘ofa he Fafakongatahi

Tukutala ‘oka nunu ‘a Pangai

 Koe ki‘i fakamatala moe huluhulu nounou

Na‘e fakafatu, fakafa‘u, mo fakafo, fakafasi, ‘a e maa‘imoa ta‘anga hiva fakamamahi (moe tutulu) malie fau ko ‘eni ‘Hiva ‘o Makahokovalu’ (‘Song of Makahokovalu’) ‘ehe Ta‘ahine ko Salote koe Kuini ‘ofeina moe punake kakato ‘iloa ‘oe ‘Otu Tonga he pekia ‘a Makahokovalu koe tama (fakataha mo Laufilitonga mo Solomone Tu‘iniua) ‘a Nopele Tuita (‘Isileli Tupou, Toluafe) mo Luseane Halaevalu Tuita he 1948 ‘i Neiafu he Vava‘ulahi. Na‘e hiva ‘ehe kau hiva ‘a Nopele Tuita (Toluafe) koe Helepeku he Fasi-Moe-Afi.

 ‘Oku ngaue‘aki lelei ‘ehe ta‘anga ‘ae fa‘ahinga lalahi ‘e tolu ‘oe heliaki koe ‘lea kihe me‘a ‘e taha kae ‘uhinga kihe me‘a ‘e taha,’ ‘aia koe heliaki fakafetongiaki (qualitative epiphoric heliaki), heliaki fakafekauaki (associative metaphoric heliaki), moe heliaki fakafefonuaki (constitutive metonymic heliaki). ‘Oku pehe hono ngaue‘aki lelei hono fakaafo, fakafasi, ‘ae liliu ‘e tolu koe liliu-fasi, liliu-ta-va, moe liliu-le‘o, voliume, ‘o afo, fasi, kehekehe ‘ae ngaahi kupu, veesi, moe tau, kolesi, mo liliu mei he tuai kihe vave moe le‘osi‘i kihe le‘olahi.

 ‘Oku kamata ‘ae tala me‘afaka‘eiki ‘o Makahokovalu mei tokelau he Vava‘ulahi kihe Houmaniutao, ‘Ahea, Futukovuna, moe Paepae ‘i Tongalahi (Tonga‘eiki, Tongatapu) he‘ene ‘hu‘ia’ ‘ae hingano mo ‘‘ufia’ ‘o takaniko hono fetu‘u ngingila (kupu, veesi, 1 & 2, kohi, laini, 1-4). ‘Oku toe lave kihe latavale ‘ae Lalaheilala he‘ene siutaka he Vava‘ulahi moe ‘Aloitalau mo hono ngaahi matanga fakalata mo fakalavetala ‘o a‘u pe ki he‘ene pekia ne ofongi hange ha loa ‘oku fakafalefale kei pongipongi (kupu, veesi, 3 & 4, kohi, laini, 1-4).

 Na‘e hoko atu ‘ae tala ‘oe pekia he lapa ‘ae matatau malohi ‘a mate he Fahina ‘oe Paepae ‘oku mausa he Fangatave mei he Hikutamole ‘i Vava‘ulahi kihe Fangasiale he Ha‘apaiveu (kupu, veesi, 5, kohi, laini, 1-4). Neongo ‘ae ta‘uluafi ‘ae kautau ‘a mate he Fahina ‘oe Paepae ka ‘oku kei faifepolepolei pe ‘ae vai tupu‘a ko Lelea he‘enau tama, ‘o mo‘oni ‘ae lea kuo fakatokotokonaki, ‘koe hulihuli ‘ae ‘akau kuo tahi’ he ‘ulifohe ‘ae Fafakongatahi koe kaimu‘a ‘ae kau kaivai moe ha‘a toutai (tau, kolesi, kohi, laini, 1-4).

 [1] ‘Oku malie fau mo loloto atu hono ngaue‘aki ‘ae ‘leveni’ koe fa‘ahinga manupuna ‘oku fulufulu lanu ‘uli‘uli (manu‘uli) koe heliaki kihe tala fakamamahi, tala ‘oe mate, moe tala ‘oe ‘uli, ‘uli‘uli koe heliaki kihe mate kae kula, kulokula ‘ae mo‘ui he kupu, veesi 4, kohi, laini 4: ‘Koe kapakau ‘oe leveni.’ ‘Oku matamata koe ma‘u mei he tala fungani ‘o Noa moe ‘A‘ake he tohitapu, ‘aia na‘a ne ngaue‘aki ‘ae leveni moe lupe koe talafekau, ‘o talangata‘a ‘ae leveni kae talangofua ‘ae lupe koe hoatamaki ‘ae tala ‘oe mate moe tala ‘oe mo‘ui.