Taa’i e Matāpule Siaina Malō pe Mo’ui: Koe Founga Faka-Mafia Nai ‘eni? ^Featured

Fakatatau ki he fakamatala ‘oku ma’u ‘e he Nepituno na’e a’u atu ‘a e toko 5 Siaina ko’eni ‘i he taimi 11:00 Pm pe ofi kiai mo e pamu mo e ukamea ‘o hū fakamalohi ‘o fakahoko ‘a e tā fakalavea ko’eni ‘o malō pe ‘a e mo’ui ‘a e matāpule Siaina ko’eni.

Ko e tokotaha ko’eni na’e fakahoko kiai ‘a e tā fakalavea ko’eni ko Yu Chuan Zhong pea kuo puke ‘e he Potungaue Polisi ‘a e toko 3 ‘a ia koe Yu Ju Ming nofo Havelu, Lin Bin nofo Ma’ufanga mo e toko 3 kehe kau ai ‘a e ki’i fefine ka ‘oku ‘ikai ‘ilo ‘e he mamahi honau hingoa ka ‘oku ma’u lelei pe honau mata. ‘Oku te’eki foki ke ma’u ‘a e tokoua pea ‘oku kei kumi ‘e he kau Polisi. ‘Oku fehu’ia lahi foki ‘a e fa’ahinga founga ko’eni ‘a ia ‘oku ho’ata mai foki ‘oku hoko ‘a e fa’ahinga founga natula fakamafia ko’eni ‘i Tonga ni pea ‘oku ‘ikai foki ke sola kiai ‘a e matakali ko’eni.

‘Oku mahino mai foki mei he fakamatala falala’anga fekau’aki mo e tā fakalavea lahi ko’eni na’e ‘i ai mo e fakamanamana mei a kinautolu na’a nau fakahoko ‘a e ngāue pango ni kapau ‘e fakahoko ha faka’ilo ‘e hoko ‘a e me’a ki he mamahi ‘a ia ‘oku tu’u fehu’ia leva ‘a e malu ‘a e kakai ‘i he fonua makatu’unga ‘i fa’ahinga to’onga pehe ni ‘a ia ‘oku tau toki anga maheni ‘aki pe he mamata kiai he Televisone moe ngaahi faiva hele’uhila.

‘Oku kau foki ‘i he fakamanamana ko’eni ‘a e feinga ke totongi huhu’i ha pa’anga ka e ‘oua ‘e toe hoko atu ha fakatonutonu fakalalo fekau’aki moe mea ni. ‘I he fakamatala falala’anga ‘oku ma’u ‘e he ongoongo ni na’e hoko ‘a e me’a ni makatu’unga ‘i ha kē ‘a e mamahi mo e matāpule Siaina ko’eni ko Yu Ju Ming ‘i he po’uli hifo ‘o e ‘aho 17 ‘o Sanuali ‘i he Karaoke ‘i Tofoa ‘a ia na’e tuhu taha ‘a Yu Ju Ming (Hufanga he Fakatapu) ki he mamahi pea iku tuki’i ai ‘e he mamahi ‘o tō ki lalo.

Na’e fakahoko foki ‘a e tā fakalavea ko’eni ‘o malava ta’ofi ko e ala ‘a e mamahi ki he hele pea iku ‘o holomui ai ‘a e kau tangata na’a nau fakahoko ‘a e tā fakalavea ko’eni. Hili ‘a e mavahe ‘a e kau tangata pea na’e tō ki lalo ‘a e mamahi ‘o iku leleaki’i ai pe ia ki Falemahaki ‘one fakaakeake mei ai. 'Oku ma'u foki moe tatau 'o e lipooti mei he Falemahaki 'a ia 'oku 'asi ai 'oku 'ikai fu'u mamafa 'a e lavea na'e hoko (minor) kia Yu Chuan Zhong lolotonga ia na'e 'ikai kene toe 'ilo ha me'a pea na'e faingata'a 'e he fakaakeake 'i ha 'aho nai 'e ua.

‘Oku toe ma’u foki mo e fakamatala falala’anga na’e ‘ikai fuoloa hono tauhi ‘e he kau Polisi ‘a e kinautolu na’anau fakahoko ‘a e tā fakalavea ko’eni ‘a ia ‘oku hoha’a lahi ai ‘a e mamahi telia ‘a e malu ‘ene mo’ui. ‘Oku toe fehu’ia foki heni ‘a hono tukuange vave ‘o e kau tangata ni mei hono tauhi ‘e he Potungāue Polisi pea koe ha ‘a e ‘uhinga na’e tukuange vave ai kinautolu lolotonga ‘oku ma’u ‘a e ngaahi fakamanamana meiate kinautolu na’a nau fakahoko ‘a e ngāue pango ni.

Ko e ‘ata ‘eni ‘o e ngaahi founga faihia faka-polofesinale ‘a ia ‘oku fa’a ‘iloa ko e to’onga faka-Mafia pea ‘oku ‘i ai ‘a e hoha’a na’a kuo ‘osi hoko ‘eni ‘i Tonga ni ka ‘oku te’eki ke ‘ilo lahia pea ‘oku totonu ke fai hano tokangaekina telia ‘a e tau’ataina ‘a e kakai ‘o e fonua mo ‘enau malu ka e tautautefito kihotau kainga muli ‘oku nau fakapaea hotau fonua ni.

Ko e malu 'a e fonua 'ok fu'i mahu'inga fau ia pea 'oku totonu ke fakamu'omu'a 'i he 'asenita 'a e kau ma'u mafai. 'I he taimi tatau 'oku lahilahi 'a e hoko 'a e ngaahi hia fakalilifu 'i hotau ki'i fonua he ngaahi 'aho ni.