Hola 'a e faka'uli hili ha pekia 'i he Hala Pule'anga 'i Fasi-mo-e-Afi Featured
22 'Epeleli, 2022. Na‘e puke ‘e he kau polisi´ ha fefine ta‘u 30 mei Pili ‘aneafi, ‘aho Pulelulu 20 ‘o ‘Epeleli 2022, ‘o felave‘i mo e pekia ‘a ha tangata ta‘u 40 ‘o Ma‘ufanga.
Naʻe hoko ʻa e fakatamaki´ ni ʻi he ʻaho Tusite 19 ʻo ʻEpeleli, fakafuofua ki he taimi 7:20 po’uli ʻi he Hala Tupoulahi´, Fasi-mo-e-Afi, ʻa ia naʻe leleakiʻi ai ʻa e pekia´ ki falemahaki kae hola ‘a e faka’uli´ hili ʻa e fakatuʻutāmaki´ ‘o ʻikai ke lipooti ki he kau Polisi´.
ʻI hono lipooti mei he Falemahaki Vaiola´ ki he kau Polisi´ ʻaneafi, ʻaho 20 ʻo ʻEpeleli´, ‘a e tuʻunga fakatuʻutāmaki na‘e ‘i ai ‘a e mamahi´, na’e ngāue atu leva ‘a e kau Polisi´ ki hono fakatotolo’i ‘o e me’a na’e hoko´.
Naʻe kumi ʻe he kau Polisi´ ʻa e fakaʻuli´ ‘o ma’u pea puke mai ai pe ʻi he pö’uli ʻaneafi´ fakafuofua ki he taimi 10:40pm.
‘Ikai ke fuoloa mei hono fakahoko e puke´ ‘anepoo´, naʻe maʻu ʻe he kau Polisi´ ha lipooti mei Falemahaki Vaiola, fakafuofua ki he taimi 11:11 po’uli, kuo pekia ʻa e mamahi´.
Ne fakahā ai pe eni ki hono fāmili´. Ko e pekia hono ua ‘eni ‘i he hala pule‘anga´ ki he ta‘u ni´, 2022.
‘Oku tauhi ‘a e faka‘iloa´ ‘i he malumalu ‘o e kau Polisi´ ke ne hā ‘i he Fakamaau‘anga´ ‘i he uike´ ni.
