'Ikai tali 'e he Tu'i Fakamaau Lahi 'a e faka'ilo 'e Semisi Sika 'a Dr. 'Uhilamoelangi Fasi ^Featured

Na’e fakahū atu foki ‘e Sika ‘ene faka’ilo (petition) ‘o launga’i ‘a Fasi ‘i he ‘aho 16 ‘o Tisema 2021 ‘o tukuaki’i ‘o pehē tokua na’e totongi fakafūfū ‘a e ni’ihi ‘o e kakai fili ke fili kiate ia.

Na’e makatu’unga ‘eni ‘i hono ikuna ‘e Fasi ‘a fili ‘a e Vahenga Fili Tongatapu 2 ‘i he Fili Fale Alea ‘a e fonua ‘i he mahina ko Nōvema 2021 ‘o mole ai ‘a e Sea ‘o Sika ‘a ia na’a ne lolotonga fakafofonga’i ‘a e vahenga ni ki he Fale Alea ‘o Tonga.

Na'e fakahoko 'a e hopo ko'eni 'i he 'aho 7, 8 mo e 10 'o 'Epeleli 'i he Fakamaau'anga Lahi 'i Nuku'alofa 'i he malumalu 'o e Tu'i Fakamaau Lahi.

Ko e tukuaki’i ko’eni ‘o Fasi ‘e Sika na’e konga 4 ‘a e na’e anga pehe ni:

1. Tukuaki’i na’e hanga ‘e Fasi ‘i he ‘aho 16 ‘o Nōvema 2021 ‘o foaki ‘a e pa’anga ‘e $100 kia Siosaia ‘Ahokovi ‘o Haveluloto.
2. Tukuaki’i na’e foaki ‘e Fasi ‘o fakafou ‘i he tokotaha kehe ‘a e koloa me’akai (groceries) ki he tu’u’anga/nofo’anga polisi fakakolo ‘e 12 ‘i Haveluloto.
3. Tukuaki’i na’e foaki ‘e Fasi ‘a e pa’anga ‘e $300 kia Telusila Pelesikoti ‘o Haveluloto ‘i he ‘uluaki uike ‘o Nōvema 2021 ke totongi ‘aki ‘ene ‘uhila.
4. Tukuaki’ii na’e hanga ‘e Fasi ‘o foaki fakafou he founga ‘ikai ‘iate ia ‘a e pa’anga ‘e $400 ki he setuata ‘o e Siasi ‘o Tonga ‘o Haveluloto ki he feinga pa’anga ‘a e siasi ‘i he ‘aho 7 ‘o ‘Okatopa 2021.

Ko e ngaahi tukuaki’i ko’eni ‘e Sika ‘a Fasi ‘oku ne taukave’i ‘oku maumaui ai ‘a e Kupu 32 ‘o e Lao Fili Fale Alea he na’e fakahoko ‘e Fasi ‘a e ngaahi totongi fakafūfū (brivery) ko’eni ke fakaloto’i ‘aki e kakai ko’eni ke fili kiate ia.

Na’e ui ‘e Sika ‘a ‘ene kau fakamo’oni ‘e toko 10 pea ui ‘e Fasi ‘ene kau fakamo’oni ‘e toko 4.

Ko e fa'ahinga hopo natula pehe ni foki 'oku makatu'unga ia 'i hono fua tautau 'e he Fakamaau'anga 'a e matamata na'e hoko 'a e ngaahi hia ko'eni oku tukuaki'i kiai 'a Fasi mei hono fua tautau (on the balance of probability) mei he ngaahi fakamo'oni 'oku tuku mai 'e he kau fakamo'oni 'o kau ai 'a e fakamo'oni 'a e talatalaaki/petitioner (Sika) mo e faka'iloa/respondent (Fasi) pehe ki hono fehu'i fakafihi kinautolu 'e he ongo tafa'aki mo e Fakamaau'anga foki.

Na’e hili hono fanongoa 'e he Tu'i Fakamaau Lahi 'a e hopo ni pehe ki he fakamalanga tohi 'a e ongo tafa'aki na'e tu’utu’uni aofangatuku leva ‘a e Fakamaau’anga ‘i hono fakahoko ‘e he Tu’i Fakamaau Lahi 'i he 'aho 15 'o 'Epeleli ‘oku tō nounou ‘a e fakamo’oni ia ‘a e Talatalaaki kenau fakamo’oni’i 'i hono fuatautau 'a e ngaahi me'a na'e 'omai 'e he kau fakamo'oni na’e fakahoko ‘e Fasi ‘a e totongi fakafūfū ko’eni ‘oku tukuaki’i ia kiai.

Na'e 'ikai tali (dismiss) 'e he Tu'i Fakamaau Lahi 'a e 'eke ni pea tu'utu'uni ai ke totongi 'e Sika katoa 'a e fakamole 'a Fasi mo 'ene tafa'aki 'i he hopo ko'eni.

Na’e fakafofonga’i ‘a Fasi ‘e William Clive Edwards Sr. pea ko Sione Etika ma’a Sika.