Tautea $12,500 Kovana Ha'apai ki he ma'u mo tauhi e kakano'i fonu Featured
Kovana Ha'apai Viliami Manuopangai mo 'ene Fakafofonga Lao Sione Taione
19 Me, 2021. Na'e hilifaki tautea 'e he Fakamaau'anga Lahi 'i he malumalu 'o Fakamaau Lahi Niu 'a e 'Eiki Kovana Ha'apai Viliami Manuopangai Hingano 'i he pongipongi 'o e 'aho ni kene mo'ua pa'anga 'e $12,000 hili ia hono fakahalaia'i 'i he mahina ko Ma'asi 'o e ta'u ni.
Na’e tu’utu’uni ‘e he Fakamaau’anga ke halaia ‘a e Kovana Ha’apai Viliami Manuopangai Hingano 'i Ma'asi ki hono ma’u mo tauhi ‘o e kakano’i fonu fe’unga mo e kilo ‘e 198 pea na'e toloi mai ai 'a e hilifaki hono tautea ke toki fakahoko he mahina ni.
Ko e kakano’i fonu ko’eni na’e puke ia ‘i he Uafu Kuini Salote ‘i he MV ‘Otuanga’ofa ‘i he ta’u 2020 'i he taimi na'e te'eki ke hoko ai 'a Viliami Manuopangai Hingano ko e Kovana 'o e Vahefonua Ha'apai.
Ko e taukapo foki ‘a Viliami Manuopangai Hingano na’a ne pehe ai na’e ‘ikai kene ‘ilo ‘e ia ‘oku ‘i ai ha tu’utu’uni pehe ‘a e lao ka na’e ‘ikai tali ‘eni ‘e he Fakamaau’anga.
Ko hono tautea ko'eni 'o e Hingano kuopau kene totongi 'a e pa'anga ko'eni 'e $12,500.
Na'e faka'ilo foki 'a Hingano 'i he malumalu 'o e Tu’utu’utni Fika 24 (g) ‘o e Ngaahi Tu’utu’uni ki Hono Pule’i ‘o e Toutai (Fisheries Management (Conservation) Regulations).
Ko Sione Taione 'a e Fakafofonga Lao 'a e Hingano.
