Ngaue popula ta'u lahi toko 3 ki he malolo ‘a Sione Feimoefiafi Featured
Mei hema ki mata'u: Kona'i Bloomfield, Siafa Nai mo Vikaleti Bloomfield
21 'Okatopa, 2020. Kuo tu’utu’uni ‘e he Fakamaau’anga Lahi ‘i he pongipongi ‘o e ‘aho ni ke ngaue popula ‘a Siafa Nai, Kona’i Bloomfield pea mo Vikaleti Bloomfield ‘o makatu’unga ‘eni ‘i he’enau halaia ki he tamate tangata ‘i he pekia ‘a Sione Feimoefiafi ‘i he mahina ko Fepueli 2019.
Na’e tautea ‘e he Fakamaau Lahi ko Cato ‘a Nai ke ngaue popula ki he ta’u ‘e 12 mo e konga pea Kona'i Bloomfield ke ngaue popula ki he ta’u ‘e 11 mo e mahina ‘e 6. Ko e ta’u ‘e ua faka’osi ‘o e tautea ‘o e ongo tangata ni ‘e toloi ia kae malu’i angalelei kinaua.
Ko Vikaleti Bloomfield leva na’e tautea ia ke ngaue popula ki he ta’u ‘e 8 mo e mahina ‘e 9 pea ko e ta’u ‘e ua faka’osi ‘o e tautea ‘e toloi ia kae malu’i angalelei he vaha’a taimi koia.
Ko e tokoua leva na’e tali halaia ki he ta ‘a ia ko Tiofilusi Nai na’e tautea ia kene ngaue ki he komiuniti he houa ‘e 70 pea ko Sione Bloomfield leva na’e tali halaia moia ki he hia ta na’e tu’utu’uni kene ngaue ki he komiuniti he houa ‘e 80.
Ko e hopo foki ‘eni na’e tu’utelinga kiai ‘a e kakai ‘o e fonua he na’e hoko foki ‘a e tamate tangata ko’eni ‘i he Hala taufa’ahau ‘i he taimi ho’ata pea na’e tokolahi ‘a e kakai na’e sio ki he me’a na’e hoko.
Ko e pekia Sione Feimoefiafi na'a ne 'i Tonga ni ko 'ene malolo mai mei 'Amelika 'o hoko ai 'a e fakatamaki ko'eni 'i he Bar Tali'eva 'i he Hala Taufa'ahau.
Na'e fakahoko 'a e hopo ko'eni 'i he mahina ko Sepitema pea na'e halaia ai pe 'a e kau faka'iloa ka ko hono toki tala 'eni 'a e tu'utu'uni tautea 'a e Fakamaau.
1 comment
-
kohai na'a ne 'ilo 'e iku ho'omou fiefia ki he mamahi, hanga 'e ho'o mou fiefia 'o fakamavahe'i kimoutolu mei homou famili. Ke mou loto fiemalie 'o ngaue'i homou tautea ko e tapuaki ia ki ho'o mou fanau, mou ngaue'i 'i he loto fiemalie pea ko e liliu tangata mo'oni ia kia kimoutolu.