Taonakita Ko e Mamahi ‘I Hono Kaume’a ^Featured

Fakatatau ki he Fakamatala ‘a e Letiō Tonga, 'oku ngāue ‘a Tōnolo ‘i he mōtele ‘i he motu ko ‘Eueiki ‘i Vava’u 'oku 'iloa koe Treasure Island. Ko e pekia koe tangata sekulitii ia 'a e mōtele. Na'e mavahe 'a e pule 'o e mōtele pea na'e pau ai ke nofo 'a e matāpule ni 'o tokanga'i 'a e mōtele. Na’e fakahoko ‘a e toutou feinga telefoni 'a e pule ki he telefoni ‘a Tōnolo pea mahino mai na’e ‘ikai pe ke tali a e telefoni ko’eni.

Na’e fakahoko ai 'a e fetu'utaki kihe taha 'o e kau ngāue 'o kumi atu ‘i he ‘aho Tokonaki 6 ‘o Sune ‘a ia koe Tokonaki ia ‘o e uike kuo’osi pea na’e faka’ohovale hono ma’u atu ‘a e matāpule ni kuo ne ‘osi pekia. Fakatatau ki he fakamatala ‘a e Pule Polisi Vahefonua Vava’u Netane Falakiseni, ‘oku hā mahino mai mei he tupu’anga ‘o e pekia ‘a e matāpule ni koe taonakita.

Na'e hā 'i he fakamatala 'a Falakiseni na'e ma'u atu 'a e pekia 'oku ne ta'utu pe 'i ha sea 'i he Falekai 'o e mōtele 'i he motu.

Na’e toe fakahā ‘e Falakiseni na’e ma’u mo e pekenene mo e mahafu 'i hono tafa'aki ‘a ia na’e fakahoko ‘aki ‘a e taonakita ‘a ia kuo ‘osi puke mo tauhi ia ‘e he kau polisi. Na’e hoko atu foki ‘a Falakiseni ‘i he’ene fakamatala ki he ongongo ‘a e Letiō Tonga ‘oku ma’u ‘ehe kau polisi mo e fakamatala falala’anga ki he tupu’anga ‘o e taonakita ko’eni.

Fakatatau ki he ‘uhinga ‘o e taonakita, na’e pehe ai ‘e Falakiseni ko e palopalema ‘eni ‘a e pekia mo hono kaume’a. Na’e ‘amanaki foki ke foki ange hono kaume’a mei Tongatapu 'i he ‘aho Falaite ko hono 5 ‘o Sune ‘a ia koe Falaite ia ‘o e uike kuo’osi pea na’e ‘ikai hoko ‘eni.

Na’e ma’u ‘e he kau polisi ‘a e ngaahi fakamatala fakamo’oni ki he fetelefoni’aki ‘a e pekia mo hono kaume’a ‘o kau ai mo’ena fefakafetongi’aki text. Na’e a’u pe foki ki he fanongo mai ‘a e kaume’a ‘o e pekia ki he ongo ‘a e pā ‘a e me’afana ‘i hono fakahoko ‘a e taonakita ko’eni.

‘Oku lolotonga ngāue pe foki ‘a e kau polisi ki he keisi ko’eni ‘o fakatatau ki he fakamatala ‘a Falakiseni. Ko e pekia ‘oku ‘i ai ‘ena ki’i ta’ahine mo hono kaume’a.