Tu'u 'i he tu'unga ta'epau 'a e sea 'o e fakafofonga Fale Alea Tongatapu 4 Matei Tapueluelu Featured
Kuo fakahu atu ki he Fakamaau’anga ha ‘eke fekau’aki mo e tu’unga fakalao ‘oku ‘i ai ‘a e mo’ua ‘o ‘Etita Maloloo ‘o e Kele’a Mateni Tapueluelu hili hano fakahu atu ‘e he Fakafofonga Lao ‘a e ‘Eiki Minista Maloloo ‘o e Potungaue Fakamaau’anga William Clive Edwards Jr. ha kole ke toe siofi ange ‘a e tu’utu’uni ‘a e Fakamaau’anga Tangi fekau’aki mo ’eni. Na’e tu’utu’uni foki ‘e he Fakamaau Polisi Salesi Mafi ‘i he ta’u 2011 mo’ua ‘a e Nusipepa Kele’a pehe ki he Faipulusi Laucala Tapueluelu mo e ‘Etita Mateni Tapueluelu ki he lau’ikovi’i ‘o e ‘Eiki Minisita Fakamaau’anga Maloloo Clive Edwards Sr. Na’e tu’utu’uni foki ke totongi ‘a e pa’anga ‘e 14,500 ‘e he kau faka’iloa.
Na’e a’u foki ‘a e hopo ni ki he Fakamaau Lahi pea ‘ikai tali ‘e he Fakamaau Lahi he ‘aho koia ‘a e kole mei he kau faka’iloa ke tamate’i ‘a e tautea ne tu’utu’uni ‘e he Fakaau Polisi Salesi Mafi. Na’e hoko atu ai ki he Fakamaau’anga Tangi ‘o a’u mai ki he ‘aho ni ‘oku te’eki mahino ‘a e ngaue kiai. Na’e fiema’u foki ‘e he Loea ‘a e mamahi William Edwards Jr. ke fakahoko ha ngaue ki he tangi na’e fakahoko pea na’a ne toe fakaha na’e ‘ikai muimui ‘a e kau faka’iloa ki he polosesi hono fakahoko ha kole tangi ki he Fakamaau’anga Tangi. Na’a ne toe fehu’ia foki ‘a e tu’unga na’e ‘i ai ‘a e kole tangi ko’eni pea koe talu mei Sune 2011 ‘oku te’eki pe ke aofangatuku ‘a e tu’utu’uni ki he hopo ni.
Na’e toe fakaha foki ‘e Edwards Jr. na’e te’eki ke totongi ‘e he Fakafofonga Falealea Tongatapu 4 Mateni Tapueluelu ‘a e mo’ua ko’eni pea hoko mo e fili Fale Alea ‘o e ‘aho 27 Novema 2014 ‘oku te’eki pe pea ‘oku fehu’ia ai foki heni moe tu’unga fakalao ‘o ‘ene hoko ko e Fakafofonga Falealea. Na’a ne toe pehe foki na’e totonu ke ‘oua ‘e tali ‘e he Komisoni Fili ke kau ‘a Mateni Tapueluelu ki he fili Fale Alea ‘o Novema 27,, 2014 fakatatau ki he Kupu 65 ‘o e Konisitutone ‘o Tonga he ‘oku lolotonga ‘i ai hono mo’ua te’eki ke totongi.
‘Oku malava foki ke fakata’e’aonga’i heni ‘a e tu’unga Fakafofonga Fale Alea ‘o Mateni Tapueluelu kapau ‘e hoko ‘eni. ‘Oku mali foki ‘a Mateni Tapueluelu moe ‘ofefine ‘o e ‘Eiki Palemia Samiuela ‘Akilis Pohiva.
