Foaki ‘Inasi $1 Miliona Pangikē Langa Fakalakalaka ‘a Tonga ki he Pule’anga Featured
Lord Matoto Sea Poate Kau Talekita Pangikē Langa Fakalakalaka ‘a Tonga 'i hono Foaki 'inasi 'o e Pangikē ki he Minisitā ki he Ngaahi Pisinisi ‘a e Pule’anga Hon. Poasi Tei
Nuku’alofa, 23 Fepueli 2016. Na’e foaki atu ‘aneafi Mōnite ko hono 22 ‘o Fepueli ‘e he Sea ‘o e Poate ‘a e Kau Talēkita ‘o e Pangikē Langa Fakalakalaka ‘a Tonga Lord Matoto ‘a honau ‘inasi (dividend) fe’unga mo e pa’anga ‘e $1 miliona ki he Minisitā ki he Ngaahi Pisinisi ‘a e Pule’anga Hon. Poasi Tei.
Fakatatau ki he me’a fakamatala ‘a Lord Matoto, ko e ‘inasi ko’eni kuo foaki ki he Pule’anga ‘oku tatau ia mo e peseti ‘e 70% ‘o e lahi ‘o e tupu (interest) ‘a e Pangikē Langa Fakalakalaka ‘a Tonga mei he mahina ko Sanuali ki Tisema ‘o e ta’u 2015. ‘Oku mahino foki ko e ‘inasi lahi taha ‘eni kuo foaki ‘e he Pangikē Langa Fakalakalaka ‘a Tonga ki he Pule’anga talu hono fokotu’u.
‘Oku hokohoko mai ‘a e foaki ‘e he ngaahi Pisinisi ‘a e Pule’anga honau ngaahi ‘inasi ki he Pule'anga ‘a ia ko e fatongia anga maheni foki ‘eni kuopau ke fakahoko ‘o fakatatau mo e tu'utu'uni 'a e Lao mo e ngaahi tu’utu’uni ki he ngaahi Pisinisi ‘a e Pule’anga.
1 comment
-
Ta ko e me'a 'oku mou hikihikito ai e interest ke fai 'aki ho'o mou fietonu ki he Pule'anga.