Tu’uaki Fakatau Atu Poate Taulanga MV Pulupaki & MV ‘Alaimoana Featured
MV Pulupaki 'i he Uafu Kuini Sālote
Nuku’alofa, 29 Mē, 2015. ‘Oku lolotonga hā foki ‘i he ngaahi tu’uaki ‘i he mītia ‘o kau ai pe foki moe uepisaiti ‘a e Poate Taulanga ‘a Tonga ‘a hono tu’uaki fakatau atu ‘e he Poate Taulanga (Ports Authority) ‘a e ongo vaka uta pasese koe Pulupaki kae pehē ki he ‘Alaimoana.
Ko e Pulupaki ‘oku ‘ikai sola kiha taha koe vaka ‘eni ‘o e Kautaha Uata Shipping Line ‘a ‘Uliti Uata pea ‘oku toe kau foki mo e MV Tautahi pehē ki he MV ‘Ikale ‘i hono tu’uaki fakatau atu ko’eni. Ko e MV ‘Alaimoana leva ko e vaka ia ‘o e Kautaha Tōfā Ramsay ‘a ia ‘oku fakalele ‘e Nunia Ramanlal.
Ko e ongoongo fakaloloma ‘eni ‘o makatu’unga ‘i he hisitōlia fua fatongia ‘o e ongo kautaha ko'eni ma’ae fonua pea koe ta’u lahi ‘a e fakahoko fatongia ‘a e ongo kautaha ko ‘eni ki hono sevesi ‘o e fefolau’aki ‘i he vaha’a ‘o e ngaahi ‘otu motu ‘o Tonga ni.
‘Oku mahino pe foki ko hono tu’uaki fakatau ko’eni ‘o e ngaahi vaka ni ‘oku lolotonga puke fakalao kinautolu ‘e he Poate Taulanga ‘o makatu’unga ia ‘i he tu’utu’uni faka Fakamaau’anga Fika CV.89 ‘o e 2014; CV 09 ‘o e 2014 mo e CV 77 ‘o e 2013.
‘Oku mahino pē foki koe makatu’unga ‘eni ‘i he ngaahi mo’ua ‘o e Kautaha Uata Shipping Line pehē ki he Kautaha ‘a Tōfā Ramsay ki he Poate Taulanga pea koe totonu fakalao pe foki ‘eni ia ‘a e Poate ke fakahoko ‘a hono fakatau atu ‘a e ngaahi vaka ni ke ma’u mai ai ‘enau fakamole.
Lolotonga ‘eni ‘oku fai e manatu ‘ofa ki he ongo mo’unga’i tangata ko’eni ‘Uliti Uata pehē kia Tōfā Ramsay kuo ne pekia ka koe ongo Fakafofonga Fale Alea malōlō ‘o e ‘Otu Ha’apai. 'Oku 'ikai tanu 'eha taha koe ngāue mateaki na’e fakahoko 'e he ongo tangata ni ma’ae folau tahi mo hono fakahoko ‘a e ngaahi sevesi na’e ‘ikai lava ‘e he Pule’anga 'o fakahoko ma'ae kakai ‘o e ‘otu motu 'o Tonga ni. 'Oku fai e salute ki he ongo tangata ni neongo 'a e fakaevaha faka pisinisi 'oku hoko ko'eni.
Kuo ma'u 'a e fakamatala falala'anga mei he loea 'a e taha 'o e ongo kautaha ni 'oku fai pe 'a e feinga na'a lava 'o haofaki 'a e teuaki fakatau ko'eni ka 'oku 'ikai mahino hono ola.
'E tāpuni foki 'a e tohi talamahu'inga (tender) ki hono fakatau atu 'o e ngaahi vaka ni ki he taimi 4:00 Efiafi 'Aho 30 'o Sune 2015.
3 comments
-
'Oku fakaloloma ka 'i he tafa'aki 'e taha koe pisinisi 'oku totonu ke fai e mateuteu ki he ngaahi tafa'aki ke totongi. Tonu pe ke fai ha ki'i kole ki he pule'anga hange koe kole ne fai 'e he kau to hina ki he ki'i tokoni.
-
Halataufa ko e me'a ongo he na'e 'iai e 'aho ne tu'u mai ai e ongo tangata ni 'o fua ta'etoefehu'ia 'a e fatongia 'o e Pule'anga ke fe'ave'aki e kakai e fonua. Me'a fakaloloma he hoko mai e kau ta'e lotu ko 'eni 'o fakatau atu e vaka ni. 'Oku 'ikai ke to e fiema'u ke 'iai ha Tonga 'e to e pisinisi.
Malo -
Koe ongoongo fakaloloma 'eni pea mo'oni ne 'aonga lahi 'a e ongo kautaha ni ki he fonua. 'Oku tokolahi foki moe kakai ne nau hola ta'e totongi he ngaahi vaka ni pea kapau na'a nau totongi 'e 'ikai mo'ua 'a e ongo kautaha.