Toe Puna Vakapuna MA60 Hili Ha’ane Tu’u Ha Māhina ‘E 3 ^Featured

Fakatatau ki he fakamatala ‘a Samiu Kiuta Vaipulu ‘a ia ‘oku ngāue mo hono ngaahi hoa ngāue ki hano toe ngaue’aki ‘a e vakapuna ni, koe toe puna ko’eni ‘a e vakapuna MA60 ‘oku fakatatau pe foki ia ki he tu’utu’uni ‘a e Tohi ki hono tauhi ‘o e vaka (Maintenance Manual).

“Kuopau ke ‘oua ‘e toe loloa ange ‘ene tu’u ‘i ha māhina ‘e 3. ‘I he’ene pehē leva kuo pau ke puna ia (maintenance flight) ke malava ke kei ma’u ‘ene setifikeiti taau mo malu ke folau (Airworthiness Certificate).” koe hoko atu ia ‘a e fakamatala ‘a Vaipulu.

Na’e toe pehē foki ‘e Vaipulu koe malava ko’eni ke fakakakakato ‘e he puna ko’eni ‘a e fiema’u ‘a e Tohi ki hono tauhi ‘o e vaka (Maintenance Manual), ‘e malava leva mei ai ke kei ‘aonga ‘a ‘ene setifikeiti malu mo taau (Airworthiness Certificate) ‘o toki ngata mei he ‘aho 15 ‘o Siulai.

‘I he taimi tatau na’e fakahā ‘e Vaipulu koe puna ko’eni na’e fakahoko ia ‘e he pailate ko Samuela Folaumoetu’i moe matāpule pailate mei Holani ‘a ia na’e pailate pe ‘i he kalasi vakapuna MA60. Na’e toki foki mai foki ‘a e ongo pailate ni mei Siaina ‘i he uike kuo maliu atu hili ha’ana toe fakahoko ha ako mo toe hiki hake (update) ‘ena ‘ilo mo e taukei ki he tu’unga ‘oku ‘i ai ‘a e vaka hangē koe founga angamaheni.

Ko e hili leva ‘a e puna ‘aneafi kuo malava ‘o kakato ai ngaahi fiema’u ki he matāpule pailate mei Holani pea ‘oku na tu’u tatau leva mo Samuela ‘i hono fakakato ‘a e ngaahi fiema’u ‘a e lao mo e tu’utu’uni fakafefolau’aki sivile pea kuo na mateuteu ke puna he vakapuna MA60 ‘i ha fa’ahinga taimi pē.

Na’e fakahā foki ‘e Vaipulu ‘oku lolotonga fakahoko pe mo ‘enau ngaue ‘o fakatatau ki he’enau ngaahi fokotu’utu’u mo ‘enau kautaha pea ‘oku ‘i ai pe ‘a e ‘amanaki lelei. Ko e Vakapuna MA60 foki koe tokoni ia 'a e Pule'anga Siaina ki Tonga ni.