Toe Ava Matapā Kava Tonga ki Siamane ^Featured

‘Oku lolotonga ‘i Tonga ni foki mo ha mataotao mei Siamane kene fakahoko ha fakatotolo ki he kalasi kehekehe ‘o e kava mo e kualitī ‘oku fiema’u ‘e he maketi. Na’e fakahā ‘e he mataotao ko'eni ki he ongoongo 'a e Letiō Tonga koe kava ‘oku ‘ikai fo’ou ia ki he mala’e fakafaito’o he na’e talu pe hono fakatokanga’i ‘i he ta’u 1870 ‘a e ‘aonga ‘o e kava ki he faito’o kae tautautefito ki he loto hoha’a (anxiety) mo e ta’efiemalie (stress).

Na’a ne fakatātā ‘aki kapau ‘oku ‘i ai ha taha ‘oku manavahē he folau vakapuna ko ‘ene folo pe ‘a e fo’i ‘akau mei he kava pea ‘e nonga leva. ‘Oku ‘ikai sola hotau kakai ki he fa’ahinga natula fakanonga ‘a e kava he ‘oku ‘ilonga pe ia ‘i he toka fuoloa ‘a e kau inu kava Tonga pea koe taimi lahi 'oku nau toki 'aho ki he houa efiafi.

Kaikehe ‘oku ‘ikai foki ke fo’ou ‘a e ongoongo ko’eni ki Tonga ni he na’e mahino pe mei he ta’u kuo ‘osi ‘a hono faka’ata mai ‘a e matapā ki he kava makatu’unga ‘i ha tu’utu’uni  ‘a e Fakama’u’anga lahi ‘i Siamane ka na’e toe fakahoko mo e ngaahi ngāue fakalao kehe ‘o toki kakato mai ki he ta’u ni.

‘Oku kau foki ‘a e kava he ma’u’anga pa’anga tefito ki he kāinga mei Tokelau ‘o tautautefito ki Vava’u mo e Ongo Niua. ‘Oku kau foki mo Tofua ‘i Ha’apai ‘i he lelei ki he tō kava pehē ki he Funga Fonua ki ‘Eua.

Fakatatau ki he fakamatala ‘a To’imoana ‘oku fakaangaanga ke uta atu ‘a e kava ki Siamane ‘i he mahina ko Sepitema. “‘Oku ‘i ai ‘a e fakatu’amelie ki he ongoongo lelei ko’eni pea ‘ofa pe ‘e hoko ‘o mo’oni” koe fakamatala fiefia ia ‘a Foaki Fanua koe taha ‘o e kau tangata to kava mei he Lolo ‘a Halaevalu.