Lahi hono kākā’i ‘a e ngaahi kautaha nō pa’anga ^Featured

‘Oku ngāue lahi ‘aki foki ‘e he kakai ‘o e fonua ‘a e fanga ki’i kautaha iiki pehe ni ko ene faingofua pea vave foki ‘o ‘ikai ke toe fou ‘i ha hala loloa ‘o hangē koe founga ‘a e ngaahi pangikē neongo ‘oku ki’i lahi ange ‘a e totongi tupu ‘a e fanga ki’i kautaha ni.

‘Oku kehekehe pe foki ‘a e founga ‘a e fanga ki’i kautaha nō pa’anga ka koe lahi taha ‘oku nau ngāue’aki ‘a e nō pa’anga kae malu’i aki ‘a e koloa faka-Tonga.

‘Oku toe ‘i ai foki ‘a e ngaahi founga malu’i kehekehe pe ‘o kau ai ‘a e me’alele mo e ngaahi koloa kehekehe pe ka ‘oku hā mahino mai he ngaahi ‘aho ni ‘a e tukufetuli ‘oku fakahoko ‘e he fanga ki’i kautaha ni mo ‘enau kau kasitoma.

Na’e toutou ‘oatu foki ‘e he ongoongo ni ‘a e ngaahi keisi kuo hoko fekau’aki mo e nō pa’anga ‘o malu’i ‘aki ‘a e ngaahi me’alele kuo haea mai pea toutou ngāue’aki pe ‘a e koloa pe me’alele tatau ki hono malu’i ‘aki ‘a e ngaahi nō pa’anga mei he ngaahi kautaha nō pa’anga kehekehe pe.

Na’e a’u tonu foki ‘a e ongoongo ni ki he taha ‘o e ngaahi kautaha nō pa’anga ke muimui’i ‘a e tu’unga ‘oku ‘i ai ‘a e kaveinga ni pea mahino mai koe mo’oni ‘oku hoko ‘eni pea ‘oku fakalalahi.

‘Oku mahino mai mei he fakamatala mei he taha ‘o e ngaahi kautaha nō pa’anga ko’eni ‘oku tokoni lahi ‘a e mītia mo e feisipuka ‘i hono ‘oatu ‘a e ngaahi hingoa ‘o e kakai ‘oku ‘ikai ke totongi ‘enau ngaahi nō pa’anga pea malava kenau feinga ke totongi mai ‘enau ngaahi nō pa’anga.

Ko e hoko atu ki he Fakamaau’anga koe founga totonu ia ke fakahoko fakatatau ki he fakamatala mei he kautaha nō pa’anga ni ka ‘oku mahino mai ‘oku loloa pea toe lahi mo hono ngaahi fakamole mo hono ngaahi pole neongo ‘e iku pe ke ma’u ‘a e fakamaau totonu.

“’Oku ‘i ai ‘a e faka’amu kemau ngāue fakataha ‘a e ngaahi kautaha nō pa’anga pea kemau fe’ilongaki ke fakasi’isi’i ‘a hono pa’usi’i kimautolu ‘e he kau kākā”, koe fakamatala ia ‘a e tokotaha mei he taha ‘o e ngahai kautaha nō pa’anga.

‘Oku mahino mai mei he fakamatala ‘oku ma’u ‘oku lavea noa’ia ‘a e kau failelei he ngāue ‘a kinautolu ‘oku ‘ikai ha loto faka’atu’i mo ta’e’ofa. ‘I he taimi tatau ‘oku tokoni ‘a e fanga ki’i kautaha nō pa’anga ‘i he ngaahi kavenga fakatu’upake ‘a e ngaahi famili ‘i he sosaieti hange koe 'apisia moe ngahai kavenga faka-siasipea ‘oku fakalave mo ‘aonga.