Fea koe Ma'u'anga Mou'i: Tokoni ki he 'Ikonomika

Ko e ma’u’anga pa’anga tu’upau ‘eni ki he kakai ‘o e fonua ‘oku nau ngaue’aki ‘a e fa’ahinga maketi pehe ni ke fakatau mo tu’uaki atu ai ‘enau koloa. ‘Oku hoko ‘a e fea ‘i he Maketi Tu’imatamona mo Tofoa ‘i he ‘aho Tokonaki kotoa koe fetaulaki ‘anga ia ‘o Hahake mo Hihifo pehe ki Vahe Nuku’alofa mo Vaheloto.

‘Oku toe mahulu atu ko hono ma’u ‘i he fea ‘a e ngaahi koloa lelei mo ma’olunga hono kualatii ‘o ma’ama’a ange ia ‘i he koloa ‘oku fakatau ‘i he ngaahi fale koloa ‘i loto Nuku’alofa. ‘Oku ha mahino mai foki ‘oku tokolahi hotau kainga ‘oku nofo muli ‘oku nau fetuku mai ‘enau koloa ‘o fakatau atu he maketi fea ‘i Tonga ni pe ko hono fetuku mai ke fakalele ‘e honau ngaahi famili.

‘Oku toe lahi pe foki moe kakai ‘i Tonga ni ‘oku nau folau atu ki muli pea nau foki mai mo ‘enau ngaahi koloa ‘o fakatau atu ‘i he fea ‘i Tonga ni. ‘Oku ‘ikai puli hono lelei ‘o e fea he ‘oku ha pe ia ‘i he tokolahi ‘a e kakai ‘oku nau lauta ‘i he feitu’u ‘oku fakahoko ai ‘a e fea. ‘Oku ‘i ai foki moe kakai tokolahi tautautefito ki he kau ngaue faka Pule’anga, kau pisinisi pehe ki he sekitoa taautaha ‘oku nau ‘amanaki lelei ma’u pe ki he ‘aho Tokonaki koe ‘aho ia kenau ‘eva ai mo e famili ki he fea pea ‘oku hoko ‘eni koe maloloo ‘anga lelei ke fakafo’ou ai ‘a e ngaahi ‘atamai kuo ongosia mo puputu'u pea ke ma’u moha fiefia.

Neongo hono toutou ‘ohake ‘a e tu’unga fakalao faka pisinisi ‘o e fa’ahinga maketi ko’eni pehe ki he ngaue ki hono muimui’i pea ke fakalao’i ka ‘oku ‘ikai foki ko Tonga ni pe ‘oku hoko ai ‘a e maketi fea he ‘oku hoko he meimei fonua kotoa ‘i mamani. ‘Oku mahu’inga a’upito ‘a e muimui ki he lao pea ke fakahoko pe ‘a e ngaue ia ki he tu’unga ‘oku ‘i ai ‘a e maketi fea ka ‘i he taimi tatau ‘oku ngali kakai ‘a Nuku’alofa he pongipongi Tokonaki kotoa pea mata malimali ‘a e kakai, fotunga faka'ofo'ofa mo longomo’ui ‘o ngali ia koe “‘Otu Motu Anga’ofa”