Tanupou ‘e he ‘Ene ‘Afio King Tupou VI ‘a e fuofua faama sola ma’a Niuatoputapu ^Featured

Ko e ngāue ni ‘oku fakapa’anga ia ‘e he Poloseki Fakama’u’anga Ivi Ma’ae Ngaahi ‘Otu Motu ‘o Tongá (Outer Island Renewable Energy Project (OIREP)) ‘a ia ‘oku fakamalumalu ‘i he Va’a Ma’u’anga Ivi ‘a e Potungāue MEIDECC.

‘Oku fakapa’anga ‘a e polokalama ni ‘e he Pangike Fakalakalaka ‘a ‘Esia (ADB), Pule’anga Fakatahataha ‘a ‘Iulope (EU), Global Environment Facility (GEF), Va’a ki Muli mo e Fefakatau’aki ‘a e Pule’anga ‘Aositeleliá (DFAT), Pule’anga Tenima’ake, mo e Pule’anga Tongá.

Ko e polokalama faka’uhila ‘o Niuatoputapú ko e konga pē ia ‘a e Mape Fakafonua Fakama’u’anga Ivi (Tonga Energy Roadmap) ke tokoni ki he taumu’a fakama’u’anga ivi ‘a e Pule’anga ‘a ia ke a’u ki he 2020 kuo fakalahi ‘a e peseti ma’u’anga ivi fakafo’ou (renewable energy) ‘o a’u ki he 50%.

Na’e fakahā ‘e he Minisitā ‘a e Potungāue MEIDECC Hon. Poasi Tei ko e me’a mahu’inga ke maama ‘uhila ‘a Niuatoputapu pea malava ke holo mo ma’ama’a ‘a e totongi ‘uhilá ki he kakai ‘o Niuatoputapú, ke malava pe ‘a e kōmiti ‘a Niuatoputapú ‘o tānaki ha pa’anga fe’unga ke tauhi’aki e ngāue ni pea ke kei ma’ama’a pē ‘a e totongi ‘uhilá.

“’Oku ou faka’amu pē ke kei tauhi ma’u ‘a e ‘uhilá hono fokotu’u ‘o e maa’imoa ni, kene malava ‘o faka’ai’ai mo fakama’ui’ui ‘a e ngaahi ngāue fakalakalaka faka’ekonōmika mo fakasosiale ‘i he vahe fonua ni, hangē ko e lālāngá, toutaí mo e ngoue fakakomesialé.”

‘I he fakamatala ‘a e Fakafofonga mei he Pangikē Fakalakalaka ‘a ‘Esáa (ADB) Tatafu Moeaki ‘oku fiefia ‘a e pangiké ke fakahā ‘a ‘enau poupou kakato ki he taumu’a ‘a e pule’angá ki a’usia ‘a e peseti ‘e 50 ‘a e ma’u’anga ivi ala fakafo’oú ‘i he ta’u 2020.

Na’a ne fakahā foki ‘oku toe tokonia ‘e he OIREP ‘a e ngaahi polokalama ngāue ki hono ako’i mo  fakataukei’i ‘a e kakai ‘o e motú ‘i he ta’u ‘e nima hili hono fakaola ‘a e ngāué ke mahino pē ‘oku ‘i ai e ‘ilo mo ha taukei ‘a e kakai ‘o e fonuá ki hono tokangaekina ‘a e faama solá.

Na’e fakafofonga’i foki ‘e he ‘Eiki Minisitá Poasi Tei ‘a e fakamālō mei he Pule’anga Tongá ki he ngaahi sino ‘oku nau tokoni ki hono fakapa’anga ‘o e ngaue ni.

‘Oku ‘amanaki foki ke fokotu’u mo e faama sola ‘i he polokalama tatau pē ‘i Nomuka, Ha’afeva, ‘Uiha mo Hā’ano.

‘Oku fakataumu’a ke kakato ‘a e ngāue ki he faama sola ‘i Niuatoputapú ‘i Tīsema ‘o e ta’u ni.

- MEIDECC