Fetaulaki mo e kau Mamonga (Meet The Mormons)

Ko e mo'ui 'a e kakai ko'eni koe kau mamahi'i 'o e Siasi 'o Sisu Kalaisi mo e Kau Ma'oni'oni 'o e Ngaahi 'Aho ki Mui ni (LDS)  pea 'oku 'omai heni 'a e kehekehe 'o e 'atakai 'oku nau nofo mo tutupu hake ai ka 'oku nau hoko koe sipinga lelei 'i hono mamahi'i 'enau tui fakalotu 'a ia 'oku hoko ia koe sipinga pe fa'ifa'itaki'anga.

Fakatatau ki he fakamatala 'a Sione Langi 'a ia koe 'Ofisa Fetu'utaki ia 'i Tonga ni mei he Siasi 'o Sisu Kalaisi mo e Kau Ma'oni'oni 'o e Ngaahi 'Aho ki Mui ni (LDS)  'i hano faka'eke'eke 'e he letio 89.5 na'a ne pehe 'oku ho'ata mai mei he faiva ni 'a e to'onga mo'ui 'a ia 'oku 'ikai ha fu'u kehekehe 'i ha tokateline fakalotu moe anga 'o e nofo 'a e kakai 'i he sosaieti ka 'oku ne 'omai 'a e natula 'o e anga mo e to'onga mo'ui 'a e kakai 'o e Siasi 'a ia 'oku mahu'inga ke tau ako mei ai.

'Oku 'amanaki ke fuofua hulu'i 'a e faiva ni 'i he Senita Faka Konifelenisi ko Fa'onelua 'i he 'aho Tusite 17 'o Fepueli ni pea toki hoko atu mei ai ki he ngaahi feitu'u kehekehe pe 'i he fonua ni.

Kuo tukupa 'a e Siasi 'o Sisu Kalaisi Mo e Kau Ma'oni'oni 'o e Ngaahi 'Aho ki Mui ni (LDS)  'e tanaki kotoa 'a e pa'anga 'e ma'u mei he faiva ni 'i hono hulu'i 'i mamani 'o foaki ma'ae kautaha Kolosi Kula (RED Cross).