Hoko atu Lord Matoto lakanga Palesiteni Siasi Tonga Konisitūtone Featured
Faifekau Lord Matoto 'o Tu'anekivale
28 Mē, 2017. Kuo fakapapau’i ‘e he Konisfelenisi ‘a e Siasi Tonga Konisitūtone ‘i Neiafu Vava’u ‘i he pongipongi Falaite 26 ‘o Mē ‘a e hoko atu ‘a Faifekau Lord Matoto 'o Tu'anekivale ‘i he lakanga Palesiteni ‘o e siasi.
Ko e Konifelenisi foki ‘eni hono 31 ‘a e Siasi Tonga Konisitūtone pea ‘oku lau teau ‘a e kau memipa ‘o e siasi ni kuo lava mai mei he tapa kehekehe ‘o Tonga ni kau ai mo muli ki he kātoanga fakata’u ni.
Na’e kamata ‘aki ‘a e Konifelenisi ni ha ouau lotu tataki ‘e he Tangata’eiki Palesiteni pea hoko atu ai pe ki he ouau anga maheni ‘o kau ai hono fakapapau’i ‘o Lord Matoto ki he lakanga ni.
Na'e 'iai foki 'a e talanoa na'e sasala 'e malōlō 'a Lord Matoto mei he fatongia ka kuo mahino mai 'a e loto 'a e Fungavaka 'o e Siasi kene kei hoko atu 'i he lakanga mafatukutuki ni.
'Oku toe hoko atu pe mo Faifekau Sione Finau Fakatou 'i he lakanga Sekelitali Lahi pea kei tokoni pe kiai 'a Faifekau Kinitoni Mafi.
'E faka'osi foki 'a e Konisfelenisi ki he uike ni pea 'e toki mavahe atu 'a e kau folau ki he feitu'u kehekehe na'a nau lava mai mei ai.
'Oku 'amanaki fakahoko mo e Konifelenisi 'a e Siasi Uēsiliana Tau'atāina 'o Tonga ki he Vahefonua Vava'u 'i he uike faka'osi 'o e mahina ko Sune.
