Vakai’i Fakamaau’anga founga ngaue Faka-Fale Alea ki he Paloti ke Fakamaloloo’i ‘a e Palemia
27 'Okatopa, 2023. Kuo ma’u ‘a e fanongonongo ‘o ha ‘eke faka-fakamaau’anga ki he ‘Eiki Sea mo e Fale Alea ‘o Tonga. Ko hono vakai’i faka-fakamaau’anga eni ‘o ha ngaahi tukuaki’i fekau’aki mo e founga ngāue faka-Fale Alea na’e ngaue’aki ki he fokotu’u ke fakamaloloo’i ‘a e ‘Eiki Palemia, Hon. Hu’akavameiliku.
Ko e fokotu'u foki ko'eni ke fakamalolo'i e Palemia na’e ngāue ki ai ‘a e Fale Alea ‘i he mahina ko Sepitema pea iku 'o paloti 'a e tokolahi ke 'oua 'e fakamalolo'i 'a e Palemia.
Ko e ‘eke ko ‘eni ‘oku fakahoko ia ‘e he Hou’eiki Memipa Fale Alea ‘e toko fitu mei he toko hongofulu na’a nau fakamo’oni ki he fokotu’u ke fakamaloloo’i ‘a e Palemia. ‘Oku lolotonga fakahoko ‘a e ngaue fakalao ‘a e kau loea ‘a e fa’ahi ‘a e Fale Aleá ki he ‘eké ni.
Ko e tu’o ua ‘aki eni ‘a e ‘eke faka-fakamaau’anga pehe ni ‘o fekau’aki mo e Fale Alea ‘i he teemi faka-Fale Alea lolotongá.
‘Oku lolotonga ta’ofi fakataimi (stay) ‘a e tu’utu’uni ‘i he ‘eke faka-fakamaau’anga ‘uluakí kae‘oua ke mahino ‘a e ola ‘o e tangi ‘a e fa’ahi ‘a e Fale Aleá fekau’aki mo e tu’utu’uni ‘a e fakamaau’angá ki he mafai ‘o e fakamaau’angá ke vakai’i ‘a e ngaahi ngāue faka-Fale Aleá.
