Fakaava 'e he Tama Pilinisi Kalauni To'u Fale Alea 2023/24
Pilinisi Kalauni Tupou To'a 'Ulukalala
1 Sune, 2023. Na'e lava lelei 'i he pongipongi 'o e 'aho ni 'a hono huufi faka'ofisiale 'o e To'u Fale Alea 2023/2024 pea na'e fakahoko ia 'e he Hou'eiki Nopele 'e toko 3 'a ia ko e Tama Pilinisi Kalauni Tupou To'a 'Uluakalala, Lord Ve'ehala pea mo Lord Niukapu.
Na'e fakahoko pe 'a e ouau ko'eni 'i he Fale Alea 'o Tonga 'i Tofoa pea na'e me'a ai 'a e 'Eiki Sea 'o e Fale Alea Lord Fakafanua, 'Eiki Palemia Hu'akavameiliku moe tokolahi 'o e Hou'eiki memipa 'o e Fale Alea pehe ki he kau Fakafofonga mei he ngaahi Pule'anga Muli mo e kau fakaafe tokolahi.
Na'e fakahoko 'a e Tō Folofola mei he Taloni 'e he Tama Pilinisi Kalauni Tupou To'a 'Uluakalala pea na'a ne me'a 'aki 'a hono fakamalō'ia 'e he Tama Tu'i Tupou VI 'a e ngaahi fokotu'utu'u ngāue 'a e Fale Alea mo e Pule'anga mo e talamonū ki he To'u Fale Alea 'oku hanganaki kiai 'a e Fale 'a ia koe To'u Fale Alea 2023/2024.
Na'e kau 'i he Tō Folofola mei he Taloni 'a e tapou 'a e Tama Tu'i ke fakapapau'i 'oku tauhi pe 'e Tonga hono vā fengāue'aki mo e ngaahi fonua lalahi mo malohi 'o mamani neongo 'enau fe'au'auhi pe kohai 'oku ivi lahi fakakautau mo faka'ikonomika.
Na'e kau ai pe foki 'a e tokangaekina mei he Taloni 'a hono tau'i 'o e faito'o konatapu pehe ki hono tokangaekina 'a e 'ikonomika 'o e fonua.
