Huufi 'e he Tama Tu'i Tupou VI Fale Alea 'o Tonga ^Featured

Ko hono huufi 'eni 'e he Tama Tu'i 'a e Fale Alea 'o Tonga ki he ta'u 2022 pea koe ouau ko'eni na'e fakahoko mai pe 'e he Tama Tu'i 'Ene Tō Folofola 'o fakafou 'i he Zoom mei he Funga Fonua mei 'Eua.

Tama Tu'i Tupou VI

Na'e 'i me'a ai 'a e tokolahi taha 'o e Hou'eiki Memipa 'o e Fale Alea 'o Tonga pehe ki he kau Fakafofonga 'o e ngaahi Pule'anga muli fakataha mo e kau fakaafe. 

Ko e Tō Folofola 'a e Tama Tu'i na'e nofo 'a e fakamamafa 'i he ngoue & toutai pehe ki hono tokangaekina 'a e sekitoa taautaha, ako, mo'ui, ma'u'anga ivi pehe ki hono tau'i 'a e faito'o konatapu 'i he fonua.

Ko e ngaahi tefito'i kaveinga vivili foki 'eni ki he fonua pea na'e toutou Tō Folofola kiai 'a e Tama Tu'i 'i he to'u Fale Alea 'e ua ki mu'a ka 'oku mahino mai 'oku 'i ai 'a e tokanga makehe 'a e Tama ki he ngaahi fiema'u vivili 'a e fonua pea 'oku mokoi hono finangalo ke fakahoko leva.

Eiki Sea Le'ole'o 'o e Fale Alea 'o Tonga Lord Tu'i Ha'angana

Na'e faka'osi 'aki 'a e ouau ni ha me'a fakamalo 'a e 'Eiki Sea Le'ole'o 'o e Fale Alea Lord Tu'i Ha'angana pea mo fili ai pe 'a e Hou'eiki Memipa kenau hoko koe Komiti Tali Folofola ke nau ngaue ki hono tali 'a e Tō Folofola 'a e Tama Tu'i hange koe anga maheni.

'Oku mahino mai 'oku lolotonga me'a 'a e 'Eiki Sea 'o e Fale Alea Lord Fakafanua ki Nu'usila fakataha mo Pilinisi Kalaniuvalu, Lord Tu'ivakanō pehe ki he 'Eiki Minisitā Ngoue Hon. Viliami Manuopangai 'a ia 'oku lolotonga 'ave fakafaito'o ki Nu'usila pe moia.

Tangata'eiki Palesiteni Siasi Tonga Tau'ataina mo e ni'ihi 'o e Kau Taki Lotu 'o e Fonua

'Oku 'amanaki ke toe ui 'a e Fale 'i he 'aho Tu'apulelulu 13 'o Sanuali ni pea 'e fakahoko ai hono fakafuakava'i 'o e Hou'eiki Memipa pehe ki hono fili 'o e Sea ki he Komiti Kakato mo hono fokotu'utu'u 'a e ngaahi Kōmiti 'a e Fale Alea.

'Oku 'oatu heni 'a e tatau 'o e Tō Folofola kiai 'a e Tama Tu'i:

‘Eiki Sea,

‘Oku ou fakafeta’i ki he ‘Otua he ‘etau a’usia ‘a e Ta’u fo’ou pea ‘oku ou fakamalo atu kiate ko e mo e Palemia fo’ou, pea pehee ki he Kau Fakafofonga kotoa ‘o e Fale ni, ‘i he lava lelei ‘a e Fili Fale Alea pea mo e fokotu’u ‘o e Pule’anga fo’ou, ‘o a’u mai ki he Huufi ko ‘eni ‘o e Fale Alea ‘o e ta’u ni.

‘Oku mahino pe ‘a e ngaahi POLE ki he kaha’u. Ko ia ‘oku totonu ke fokotu’utu’u lelei ‘etau ngaahi Taumu’á ki he Langa ‘o e Fonua, koe’uhi ‘oku ‘ikai ke ‘i ai ha’atau koloa fe’unga ke fakalato kotoa ‘a e ngaahi fiema’ú. ‘I he fiema’u ke tau laka atu kimuá, kuopau ke tau vakai leva ki he TUKUNGA FAKAPA’ANGA LOLOTONGA ‘o e Fonua.

‘E ‘ikai ke malava ‘e he ‘etau maketi fakaloto fonua ke feau ‘a e fetoo’aki ‘a e fefakatau’aki mo Muli. Ko e LOLO foki mo e ME’ATOKONI ‘a ‘etau ongo koloa Hu Mai lahi taha.

‘E malava ‘e he Ma’u’anga Ivi mei Natula ke holoki ha konga si’i pe ‘o e ngaahi fakamole ki he Lolo, ka ‘oku fiema’u ke tokonia ‘e he Pule’anga ‘a e fakatapu fakalotofonua ‘o e Me’atokoni, pea ke malu’i faka-Lao ‘a e ngaahi NGAUE’ANGA ‘oku kei langalanga hake, hangee ko e NGOUE mo e TOUTAI.

Ko ia ai, kuopau ke fakamu’omu’a ‘a e ngaahi ngaue Langa Fonua ‘oku tataki mei he Va’a ‘o e SEKITOA FAKATAAUTAHA, ‘o hange koia ‘oku haa ‘i he ‘etau Palani Fakalakalaka pea poupou ki ai ‘a e Ngaahi Fonua ‘oku nau tokonia ‘a e Langa Fakalakalaka.

‘Oku kei tu’u kimu’a pe ‘a e fiema’u ke MO’UI LELEI pea ke AKO ‘a e Kakai ‘o e Fonua, koe’uhi ke lava ke tau nga’unu kimu’a ‘o fakatatau ki he ‘etau Ngaahi Taumu’a Langa Fakalakalaka.

‘Oku kei hoko pe ‘a e Mahaki Faka’auha, ko e COVID-19, ko e pole lahi lolotonga ia ki he kakai kotoa ‘o e Fonua, ‘o hangee pe, ko e pole lahi ‘o e FAITO’O KONA TAPU ki he Fonua kae tautefito pe ki he To’utupu.

Ko ia, kuo mahino ‘a e ngaahi pole ki he To’u Fale Alea koeni.

Ko e ha ‘a e ngaue ‘a e Pule’anga ke tali’aki ‘a e ngaahi pole koeni, ‘oku totonu ke ALEA’I ia mo FA’UFA’U ke maau ‘a e ngaahi founga ki hono FAKAHOKO ‘i he Fale ni.

‘Oku ou talamonu atu ke tataki kimoutolu ‘e he ‘Eiki ‘i he fakahoko ‘o e ngaue ki he lelei ‘a Tonga mo hono Kakai.

‘Ofa atu.