'Ikai ha toloi he Fili Fale Alea 'a e fonua Featured
Pita Vuki
5 Novema, 2021. Kuo fakaha mei he Komisoni Fili 'a Tonga 'e 'ikai ha toe toloi 'a e fili Fale Alea kuo 'amanaki ke fakahoko ki he 'aho 18 'o Novema, 2021.
'Oku mahino pe foki 'a e fakataputapui ia 'a e fonua pea 'e toki 'ataa ia 'i he 'aho 8 'o Novema, 2021 pea 'oku mahino pe ia 'e kei 'i ai pe 'a e taimi 'e faka'ataa ki he kemipeini kimu'a pea fakahoko 'a e fili.
Ko e fakataputapui foki 'eni 'a e fonua makatu'unga 'i he mahino mai kuo tu'uta 'a e vailasi Covid-19 'i Tonga ni.
Ko hono fakaha foki 'eni 'e Pita Vuki pea 'oku fakahoko pe 'eni ai 'o fakatatau ki he Lao ki he Fili Fale Alea 'a ia 'oku ha mahino pe he Kupu 10A 'o e Lao ki he Fili Fale Alea.
10A Toloi ‘o e Fili
(1) Kapau ‘e ‘ikai lava ha fili ‘i ha fai‘anga fili ‘o kamata pe kuo ta‘ofi fakataimi koe‘uhi ko ha fakatamaki fakaenatula, ‘ikai lelei ‘a e tu‘unga ‘o e ‘ea pe ha ‘uhinga kehe, ‘e ngofua ki he Supavaisa ke toloi ‘a hono fakahoko ‘o e fili ‘i he fai‘anga fili ko ia ki he ‘aho hono hoko, pea ka fiema‘u mei he ‘aho ki he ‘aho kae ‘oua kuo lava ‘o fakahoko ‘a e fili, pea kuo pau, kapau kuo ne toloi ‘a e fakahoko ‘o e fili ke ‘oatu ha fanongonongo fakapule‘anga ‘o e toloi ‘i ha founga ‘oku ne fakakaukau ‘oku fe‘unga.
'Oku tu'utu'uni foki 'e he lao 'e ta'ofi ha toe kemipeini 'i he houa 'e 24 ki mu'a pea fai e fili.
