Pekia ‘a Faifekau Dr. Liufau Vailea Saulala ^Featured

Ko Faifekau Dr. Liufau Vailea Saulala koe Palesiteni ia ‘o e Siasi Tokaikolo ‘Ia Kalaisi pea na’a ne pekia ‘i he Falemahaki Middlemore ‘i ‘Aokalani Nu’usila ‘i he ‘aho Tu’apulelulu ko hono 19 ‘o Nōvema 2020

‘Oku te’eki foki ke fakapapau’i ha ‘aho ‘e fakahoko ai ‘a e me’afaka’eiki ‘o Faifekau Dr. Liufau Vailea Saulala ka ‘oku mahino ‘e fakahoko pe ‘eni ‘i 'Aokalani 'i Nu’usila.

Ko Faifekau Dr. Liufau Vailea Saulala na’e ‘iloa ‘i he fonua ‘i he mala’e ‘o e lotu pea ko’ene ngaahi malanga ‘oku kei vanavanaiki ki he tokolahi ‘o e fonua pehe ki hono kaingalotu.

Na’e kaunga tonu ‘a Faifekau Dr. Liufau Vailea Saulala ki hono langa ‘a e Siasi Tokaikolo ‘Ia Kalaisi talu mei he ta’u 1980 tupu ‘o kau ai mo hono fokotu’u ‘o e Kolisi Lavengamalie pea na’a ne Puleako ai ‘i he ta’u lahi ‘o a’u mai ai pe ki he’ene pekia ko’eni.

Ko e pekia ko’eni ‘a Faifekau Dr. Liufau Vailea Saulala ‘oku ne lolotonga hoko koe pule lahi (Vice-Chancellor) ‘o e ‘Univēsiti Fakakalisiate ‘a e Pasifiki (Pacific Chirstian University) pea koe konga ia ‘ene ngaahi vīsone ‘i he mala’e ‘o e ako.

Na’e ‘amanaki foki ke kātoanga’i ‘a e a’usia ‘e he Kolisi Lavengamalie hono ta’u 40 ‘i he uike ni ka ‘oku toe mohetolo atu ko e taufa kāfakafa ko’eni kuo huki tonu ‘i he Siasi Tokaikolo ‘Ia Kalaisi pehe foki ki he fonua.

Na’e fakafolau foki ‘a Faifekau Dr. Liufau Vailea Saulala ‘i he ‘uhinga faka-faito’o kimu’a ‘i he fakataputapui ‘o e covid-19 pea na’e me’a pe ‘i Nu’usila ‘o a'u ki he’ene pekia ko’eni 'i hono ta'u 75

Ko Faifekau Dr. Liufau Vailea Saulala foki mei Leimātu’a mo Vaihoi ‘i Vava’u pea na’a ne ma’u hoa kia Falamoni Saulala ‘o Kolomotu’a ka kuo ne pekia moia 'i he ta'u ni pe pea ‘i ai moe fanau ‘e toko 6 pea pekia ai mo e toko taha.

‘Oku kei mo’ui lelei pe ‘a e toenga 'o e fānau ‘a Faifekau Dr. Liufau Vailea Saulala 'a ia ko Faifekau Alister Saulala, Sione Sangster Saulala, Vili Vailea Saulala, Tinitale Saulala mo ‘Apoinita Saulala mo e makapuna.